Ел Тәуелсіздігінің 30 жылдығына орай Талас ауданының орталығы Қаратау қаласында «Қазақстан Республикасының Тәуелсіздігіне – 30 жыл» саябағы ашылды. Аталған саябақ – өңірдегі ірі кәсіпорындардың бірі «Қазфосфат» ЖШС демеушілігімен салынған. Нысанның жалпы құрылысына 80 млн теңге жұмсалған. Ал саябақтың аумағы 1,15 гектарды құрайды. Жаңа ашылған саябақ бұдан былай қала тұрғындарының серуендейтін, демалатын орнына айналмақ.
Нысанның ашылу салтанатына қала тұрғындарымен қатар Жамбыл облысының әкімі Бердібек Сапарбаев, «Қазфосфат» кәсіпорнының бас директоры Нұрхан Нұрланов және Талас ауданының әкімі Қанатбек Мәдібек қатысты. Өз сөзінде Б.Сапарбаев елімізде, оның ішінде Әулиеата өңірінде атқарылып жатқан барлық шаруа тәуелсіздіктің жемісі екенін, Мемлекет басшысы да аймақтарға тиісті көңіл бөліп отырғанын атап өтті. Сонымен қатар егемендіктің тойына орай Қаратау тұрғындарына осындай керемет саябақты тарту еткен «Қазфосфат» кәсіпорнының басшылығына алғысын жеткізді. Ал Нұрхан Нұрланов мұндай игі істердің алдағы уақытта облыс орталығы Тараз қаласында және Сарысу ауданының Жаңатас қаласында жүзеге асырылатынын атап өтті.
Тәуелсіздік саябағы заман талабына сай салынған. Саябақ алаңына текшетастар төселіп, көгалдандыру жұмыстары жүргізілген. Сондай-ақ онда жайлы орындықтар, жарық бағаналары, қоқыс жәшіктері мен балаларға арналған әткеншектер орналасқан. Одан бөлек, футбол мен баскетбол стадиондары және стрит воркаут алаңшалары бар.
Жамбыл облысы