Орта салмақтағы IBF және IBO чемпионы қазақстандық Геннадий Головкин (41-1-1, 36 КО) мен WBA Super титулының иегері жапониялық Риота Мурата (16-2, 13 КО) арасындағы жекпе-жек биыл өтпейтін болды.
Әу баста үш тұжырым бойынша чемпиондық атақ сарапқа салынатын кездесу 29 желтоқсанда Жапонияда өтеді деп жоспарланған болатын. Алайда Жапония билігінің коронавирус пандемиясына байланысты қабылдаған жаңа шектеулерінен кейін ұйымдастырушылар жекпе-жекті кейінге шегеруге мәжбүр болды. Себебі елдегі жаңа қаулының ережесі бойынша, енді шетел азаматтары Жапонияға кіре алмайды. Бұл шара әлемді шарпыған коронавирустың «Омикрон» штамы таралмас үшін жасалған.
Ресми тұлғалар Геннадий Головкин үшін жеңілдік сұрағанымен, Жапония үкіметі оған келісім бермеген. Кейіннен айқастың биыл өтпейтінін отандасымыз Геннадий Головкин де, Риота Муратаның ісін жүргізетін Teiken промоутерлік компаниясы да ресми түрде мәлімдеді