Елдің межелі, мерейлі жылы болады. Міне, биыл – Тәуелсіз Қазақстан Республикасының 30 жылдығы. Бұл өткен жолымызға зер сала қарайтын, өзімізге де, жетістіктерімізге де есеп беретін тұсымыз.
Осы орайда, Елбасы Н.Ә.Назарбаевтың «Тәуелсіздік тағылымы» атты мақаласын баршамыз шын ықыласпен оқып, өзіміз ел Тәуелсіздігінің 30 жылдық мерейтой қарсаңында әлемдік өркениеттің алдыңғы шебі, дүниедегі дамыған елдердің қатарына қосылғанын мақтанышпен сезініп отырмыз. Тәуелсіз Қазақстан үшін ол – үлкен белес, асқаралы асу. Автор мұндайға тек рухы күшті, бірлігі бекем жұрт қана қол жеткізе алатынын атап өтті.
Нұрсұлтан Әбішұлы бұрын көп айтыла бермейтін кейбір деректі халықтың назарына ұсынды.
Кеңес Одағы тоқырау кезінде жоғары билік бекіткен жоспар мен қосып жазуға негізделген кеңестік экономика, жалаң ой, жадағай пікірлі коммунистік идеология қоғам дамуын тығырыққа тіреді. Елбасы ел экономикасында орын алған мүшкіл халді Қарағанды облыстық партия комитетінде басшылық қызмет атқарған 70-жылдардың соңында айқын аңғара бастағанын, Қазақ КСР Үкіметінің басшылығына тағайындалған 80-жылдары жағдай тіпті асқынып тұрғанын еске алды. М.С.Горбачевтің «қайта құруы» тоқырауға белшесінен батқаннан кейін Одақ құрамындағы 15 республика түгелдей өз егемендігін жариялады. Осылайша, 1991 жылдың 1 желтоқсанында ел тарихындағы Тұңғыш президенттік сайлау өткізіліп, онда халықтың 98%-дан астамы Н.Назарбаевқа қолдау білдірді.
Көптен күткен күн туып, Жоғарғы Кеңестің 1991 жылғы 14 желтоқсанында өткен 12-шақырылған 7-сессиясының талқылауына «Қазақстанның мемлекеттік тәуелсіздігі туралы» Конституциялық заң жобасы шығарылып, 16 желтоқсанда көпшілік дауыспен қабылданды. Бұл кезде Н.Ә.Назарбаевтың тарихи рөлі зор екенін айта кетуіміз қажет. Бұл бәріміз көптен күткен айшықты мезет, тарихи оқиға еді. Біз тәуелсіздікке бейбіт жолмен қол жеткізсек те, оған барар жолда бабалар қаны аз төгілген жоқ. Тәуелсіздік сол киелі қанның өтеуі еді. Елбасы мұның бәрін біз сенген, тәрбиелеген бүгінгі жас ұрпақ білсін, санасына сіңірсін деп жазып отыр.
«Тәуелсіздікті жариялау оңай емес, оны бүкіл әлемге мойындату одан да қиын еді», деп жазған Нұрсұлтан Әбішұлы Қазақстан тәуелсіздігінің осындай биік деңгейде мойындалуын да алдын ала ойластырып қойғанына арнайы тоқталды.
«Ынтымағы жарасқан елдің табысы тасып, абыройы асады. Берекесі қашқан елдің қуаты кеміп, құты қашады. Отыз жыл ішінде біз ғасырларға бергісіз даму жолынан өттік. Ауыз толтырып айтар табыстарымыз да аз емес», деді Елбасы.
Тәуелсіздік жариялаған соң жүйелі саяси реформалар қолға алынды. Осыдан жиырма бес жыл бұрын бүгінгі барлық жетістіктерімізге берік заңнамалық іргетас болып қаланған Ата Заңымыз – жаңа Конституциямыз қабылданды. Бүкіл халық болып талқылаған бұл құжат ел даналығы мен ынтымағының, береке-бірліктің іргетасына айналды.
Тәуелсіз еліміздің басты байлығы – адам. Мемлекетіміздің тірегі де, алтын діңгегі де – Қазақстан халқы. Елбасы бойындағы қуат, қызметіндегі тәжірибе, ойындағы нәр – бәрі-бәрін халқына қызмет етуге жұмсап келеді.
Тәуелсіздік те бақыт сияқты, бағалаған адамның, аялаған қоғамның қолына тұрақтайды. Халқы тату, экономикасы қуатты, саяси жүйесі тұрақты, мәртебесі биік, абыройы асқақ Қазақстанның болашағы кешегіден кемел, бүгінгіден нұрлы екендігіне кәміл сенетінін атап өтті.
Елбасымыздың «Тәуелсіздіктің мән-мағынасы туралы түрлі ғылым өкілдері өзінше тұжырым жасайтыны анық. Бірақ бір нәрсе ақиқат, ол – ата-бабаларымыздың азаттық жолындағы жан алысып, жан беріскен сан ғасырлық күресінің заңды жалғасы, халықаралық құжаттармен бекітіліп, мәңгілікке берілген сыйы» деген қанатты сөзі бар. Біз қанын да, жанын да қиып, жерін қорғаған бабаларымыздың алдында мәңгілік қарыздармыз!
Енді бүгінде азат ел болған тұсымызда еселі еңбегімізбен, отансүйгіш қасиетімізбен Тәуелсіз Қазақстанымызға қызмет етуіміз керек!
Асқарбек ҮЙСІМБАЕВ,
Мәжіліс депутаты