Арнайы аймақтардың қызметі кеңейді

Бұл сыртқы экономика­лық байланыстарды жандандыру, экономиканы қолдау және өңірлердің әлеуметтік проблемаларын шешу, арнайы экономикалық аймақтардың жұмысына инвестициялар, технологиялар мен қазіргі заманғы менеджментті тарту үшін жасалды.

Былтыр «Ақтау теңіз порты» арнайы аймағының қызмет түрлері кеңейтілді. Енді аталған аймақта мынадай жобалармен айналысуға болады: жылу электр стансаларымен электр энергиясын өндіру; электр энергиясын беру және тарату; тұрғын және тұрғын емес ғимараттар құрылысы; қонақ үйлер және тұруға арналған орындар қыз­меттерін ұсыну; жеке немесе жалға алынған жылжымайтын мүлік­ті жалға алу және басқару; демалыс пен ойын-сауықты ұйым­дастыру қызметтері.

Қарқынды дамып келе жатқан аймақтардың бірі – «Сарыарқа» арнайы экономикалық аймағы. Онда дайын металл бұйымдары мен құрылыс материалдары: шарлы крандар, жылу оқшаулағыш құбырлар, отқа төзімді материалдар, жезден жасалған бұ­йымдар, дірілге және отқа төзім­ді бұйымдар шығарылады. Енді «Сарыарқа» істен шыққан көлік құралдарын, арнайы техника және ауыл шаруашылығы машиналарын, тоңазытқыштар мен тоңазытқыш жабдықтарын жинап, өңдеп және қалдықтарды жойып, қалпына келтіре алады.

Qyzyljar арнайы экономи­калық аймағы ұсынатын қызмет түрлерінің толықтырылған тіз­бесіне ағаш массасы мен целлюлоза, қағаз және картон, гофрокартон, қағаз және картон ыдысы, шаруашылық-тұрмыстық және санитарлық-гигиеналық мақсаттағы қағаз бұйымдары, фармацевтикалық өнімдер мен препараттар, ветеринарияға арналған дәрілік препараттар өндірісі кірді.

Қызметтің басым түрлерінің тізбесі TURKISTAN арнайы эко­номикалық аймағында да кеңейтілді. Нысандарға кешенді қызмет көрсету, аумақтарды абат­тандыру қызметтері, жиһаз бен интерьер заттарын жөндеу, тамақпен және сусындармен қамтамасыз ету бойынша қыз­мет көрсету, электронды және оптикалық жабдықтарды жөн­деу, басқа топтамаларға енгізіл­меген ақпараттық технологиялар мен жүйелер саласындағы өзге де қызмет түрлері қосылды.

Бұдан басқа, «Ұлттық ин­дус­­т­риялық мұнай-химия тех­нопаркі», «Ақтау теңіз порты», «Сарыарқа», «Тараз химиялық паркі» және «Павлодар» арнайы экономикалық аймағында қызмет түрлері «Көпбейінді ауру­хана құрылысы және пай­да­лануға беру» тармағымен толықтырылды.

Сонымен қатар өткен жылы бірнеше арнайы экономикалық аймақтың аумағы ұлғайтыл­ды. «Сарыарқа» аймағының ауданы жылу электр стансасын және ферроқорытпа мен кокс өндіретін зауыттар салу үшін 345,5 гектарға өсті. Qyzyljar аймағына қағаз және қағаз өнім­дерін өндіретін зауыт салу үшін 15 гектар қосылды. «Астана – жаңа қала» арнайы эко­номи­калық аймағы 83,7 гек­тарға ұл­ғайып, оның аумағында темір­жол машина жасау кластері құрылды. Кезінде жеңілдіктер құры­лыс индустриясына қатысу­шыларды қызықтырып, қысқа мерзім ішінде көптеген тұрғын үйлер және әлеуметтік нысандар салынды. Елорданың сол жағалауында жаңа әкімшілік-іскерлік және мәдени орталық құрылды.

Бүгінгі таңда Қазақстанда 13 арнайы экономикалық аймақ жұмыс істейді. 2002 жылдан бастап онда 307 жоба іске асырылып, 21 мыңнан астам тұрақты жұмыс орны ашылды. Арнайы аймақтардың ерекше мәртебесінің нәтижесінде кәсіпорындарда 30-дан астам жаңа өнім түрі, оның ішінде оптикалық құрылғылар, түнде көру аспаптары, бронетранс­портерлер, локомотивтер, жолаушылар вагондары, премиум-класты құбырлар, мақта целлюлозасы, полипропилен жіптер және тағы да басқа дүниелерді шығару жолға қойылды.

Арнайы аймақ қатысу­шы­лары үшін бизнесті мемле­кет­тік қолдау аясында бірқа­тар жеңілдіктер жасалды. Атап айт­қанда, резиденттер корпо­ра­тивтік, жер және мүлік салы­ғын төлемейді. Арнайы аймақ аумағында сатылатын тауар­лар үшін қосымша құн салы­ғы­ның мөл­шерлемесі 0-ге тең. Жер учас­­ке­леріне барлық қажет­ті инф­рақ­ұрылым тартылады. Учас­келер арнайы аймақ режі­мінің бар­лық кезеңіне тегін беріледі. Қатысушылар жалдау және жер салығын төлеуден босатылған.