Шелли БЕРКЛИ, АҚШ-тың конгресс-вумені:
– Қазақстан – АҚШ-тың өте маңызды стратегиялық әріптесі. 1991 жылы Қазақстан Президент Нұрсұлтан Назарбаевтың басшылығымен Семей ядролық полигонын жауып, әлемдегі төртінші ядролық арсеналдан өз еркімен бас тарту туралы ерлікке пара-пар шешім қабылдады. Қазақстан осы уақытқа дейін мұндай батыл да кемеңгерлік қадам жасаған, әлемге қауіпсіздік жолын көрсеткен бірден-бір мемлекет болып табылады. Біз жаһандық қауіпсіздікті қамтамасыз ету жолындағы Қазақстанның орасан зор үлесі үшін шексіз ризамыз. Осы жолдағы Қазақстанның көшбасшылығы және оның ядролық қаруды таратпау саласындағы АҚШ-пен жоғары ынтымақтастығы басқа мемлекеттер үшін үлгі болуға тиіс.
Роберт ВЕКСЛЕР, конгрессмен-демократ,
Джозеф ПИТТС, конгрессмен-республикалық:
– Жалпы қырып-жою қаруын таратуға және лаңкестікке қарсы біздің жаһандық күресімізде Президент Нұрсұлтан Назарбаев бастаған Қазақстан халқы мен Үкіметі Құрама Штаттардың берік одақтасы болып табылады. Құрама Штаттардың халықаралық қауымдастықпен өзара іс-қимыл шеңберінде Таяу Шығыста демократияны орнықтыру және Иракты қалпына келтіру мәселелерінде Қазақстанмен байланысты барынша нығайту АҚШ-тың мемлекеттік мүдделеріне толық жауап береді.
Дэн ДЕВИСОН, Халықаралық білім беру кеңесінің президенті:
– Сол шарада Президент Нұрсұлтан Назарбаевтың тарапына аса жоғары баға берілді, ресми Вашингтоннан мұндай жоғары баға алу өте қиын. Сондықтан мен осы уақытқа дейін мұндай лайықты жоғары баға алған шетелдік басшыны айта алмаймын.
Митчелл РИСЕ, халықаралық сарапшы, АҚШ Мемлекеттік департаментінің саясатты жоспарлау жөніндегі экс-директоры:
– Бүгінде Қазақстан планетада тұрақтылықты және бейбітшілікті қамтамасыз ету жолында және адамзаттың мүддесі үшін ерікті түрде ұстамдылық танытқан мемлекет ретінде әлемге үлгі болып табылады. Қазақстан ядролық арсеналдан бас тартқан және ядролық сынақ полигонын жапқан әлемдегі бірінші мемлекет ретінде айрықша орын алады. Бұл мемлекеттің ядролық қаруды таратпауға деген ұстанымы ядролық қаруға құштар мемлекеттер үшін ықпалды және ізгілікті сабақ бола алады.