Дәстүрлі іс-шараға айналған қолөнершілер көрмесі биыл да Жібек жолы көшесінің бойын алқызыл түске бояды. Шеберлер қолынан шыққан мыңнан астам көркем дүниелер көрерменге көктемнің хабаршысындай әсер еткенін осы күнгі көңіл күйден аңғаруға болады.
Түрлі түсті текеметтер, киізден басылған бұйымдар, бас киімдер, қамыстан өрілген әбзелдер, ағаштан жонылған тостағандар, астаулар, былғары блоконттар, тағы да басқа қолөнер бұйымдарының әрқайсысына назар аудармай кете алмайсыз. Әр композицияның ерекше нақышта орындалғаны оның сәнін ғана емес, құнын да әспеттеп тұрғандай.
Қазақстан қолөнершілер палатасының ұйымдастыруымен екі күн қатарынан өткен бұл көрменің жыл сайын Жібек жолы көшесінің бойында өтуі жайдан-жай емес. Ұйымдастырушылардың айтуынша, табиғи өнімдерден жоғары талғаммен жасалған көркем дүниелерді келушілер Ұлы Жібек жолының бойымен өткен сауда керуенінің заманауи формасы ретінде қабылдайды. Соңғы он жылдан астам уақыттан бері дәстүрлі шараға айналған қолөнер көрмесіне алматылықтар ғана емес, еліміздің басқа өңірлерінен де шеберлер қатысуда.
Бүгінде шеберлер қолөнерлік кәсіпті жеке кәсіпкерлікпен ұштастырып, осы саланы дамытуға барынша үлес қосып келеді. Қазақстандық шеберлер жасаған бұйымдар еліміз ғана емес, Еуропа, Орталық Азия елдеріне де танымал. Бұл көрменің әлеуметтік сипаты да басым. Қазақстан Қолөнершілер палатасы осы жоба аясында әлеуметтік қорғауға мұқтаж азаматтарды жүн мен киізден бұйымдар дайындауға оқыту, зағип жандарды жүн мен былғарыдан бұйымдар өңдеуге және дайындауға, жұмыссыздарды күміс пен мельхиордан зергерлік бұйымдар жасауға үйретуді де мақсат етіп келеді.
АЛМАТЫ