Иорданияның Амман қаласында бокстан жасөспірімдер арасындағы Азия біріншілігі жалғасуда. Жартылай финал жекпе-жектерінің қорытындысы бойынша бес қазақстандық боксшы қыз финалға жолдама алды.
Ұлттық Олимпиада комитетінің мәліметі бойынша, 50 килода жұдырықтасатын отандасымыз Карина Тоқыбай, Ұлдана Таубай (60 кило), Нұрсұлу Сүйенәлі (63 кило), Аружан Жанғабаева (66 кило) және Құралай Егінбайқызы (80 кило) жартылай финал кездесулерінде жеңіске жетіп, сары құрлық біріншілігінің финалына жолдама алды.
Өкінішке қарай, жартылай финалда Диана Елеусіз (46 кило) өзбекстандық Жасми Тохировадан, Гауһар Зарден (48 кило), Шахназ Тайыржанова (52 кило), Айша Сариева (54 кило) үндістандық спортшыларға есе жіберді. 57 килодағы жерлесіміз Анар Сәлімбай иорданиялық Ая Сувиндехттен, ауыр салмақтағы Аружан Зейноллаева өзбек қызы Собирахан Шахобидиновадан жеңіліп қалды.
Осылайша, бес боксшы қызымыз Азия чемпионатының финалында жұдырықтасады.