Қазақстанның бірінші, әлемнің 33-ракеткасы Александр Бублик Индиан-Уэллсте (АҚШ) өтіп жатқан Masters турнирінің үшінші айналымына шықты.
Жүлде қоры 8,5 млн АҚШ долларынан асатын жарыстың 31-ракеткасы ретінде тіркелген А.Бублик доданы екінші айналымнан бастады. Жерлесіміз бұл кезеңде кезінде әлемдік рейтингте біраз уақыт көш бастаған, «Үлкен дулыға» турнирлерінің үш дүркін жеңімпазы (2012, 2013, 2016), екі мәрте Олимпиада чемпионы (2012, 2016) ұлыбританиялық Энди Марреймен шеберлік байқасты. Екі сағатқа жуық созылған тартысты бәсекеде қазақстандық теннисші қазіргі кезде дүниежүзілік рейтингте 88-орында тұрған атақты қарсыласын 7:6 (11:9), 6:3 есебімен тізе бүктірді. Александр матч барысында 11 эйс жасап, 5 брейк-пойнттың біреуін пайдаланды. Э.Маррей 4 эйспен шектелді.
Бұған дейін екі теннисші кортта екі мәрте кездесіп, екеуінде де Энди Маррейдің мерейі үстем болған еді. Ал үшінші матчта отандасымыз мықтылық танытты. Бублик үшінші айналымда әлемнің 35-ракеткасы болгариялық Григор Димитровпен кездеседі.