Таяуда Нұр-Сұлтан қаласындағы республикалық «Әзірет Сұлтан» мешітінде ашылған сирек кітаптар мен қолжазба еңбектер көрмесі өз жұмысын аяқтады.
Қолжазбалар және сирек кітаптар ұлттық орталығының қолдауымен өткен көрме аясында арнайы жасақталған экспозицияға 20-дан астам қолжазба еңбектер мен құнды жәдігерлер қойылып, көпшілікке таныстыру жұмыстары жүйелі түрде жүргізіліп тұрды. Сондай-ақ жұртшылық қызыға тамашалаған аталған көрме сөрелеріне діни қызметкерлер жинақтаған қасиетті Құран кітабының әртүрлі нұсқалары көрермен назарына ұсынылды.
Мұнда Әл-Фараби бабамыздан бастап 850-ге жуық ғұламаның өмірбаяны қамтылған «Уафият әл-Аян» сынды құнды еңбектер, Ислам дініне қатысты түрлі баспа өнімдері, VII ғасырға тиесілі қасиетті Құран кітабының көшірмесі көрмеге келушілердің назарын аударды.
Көрме барысында Қолжазба және сирек кітаптар ұлттық орталығының ғылыми қызметкері Алмас Иманғалиев пен «Әзірет Сұлтан» мешітінің наиб имамы Әділхан Иманәліұлы күнделікті келушілерге көрме жұмыстарын таныстырып, сирек еңбектер бойынша мағлұмат беріп отырды.