Эстония астанасы – Таллинде өтіп жатқан мәнерлеп сырғанаудан жастар арасындағы әлем чемпионатында қазақстандық спортшы Михаил Шайдаров жоғары нәтижеге қол жеткізіп, жаһандық доданың күміс жүлдесін жеңіп алды.
Мұны Қазақстан мәнерлеп сырғанау тарихындағы ірі жетістіктің бірі деп айтуға толық негіз бар. Өйткені бұған дейінгі жастар арасындағы әлем біріншілігінде талай өрендеріміз бақ сынаса да, бірде-біріне жүлдегерлер қатарынан көріну бақыты бұйырмаған еді. Тіпті Олимпия ойындарының жүлдегері және қатысушысы болған Денис Тен мен жарақатына байланысты былтыр ғана карьерасын аяқтаған Элизабет Тұрсынбаева да әлемдік сында өнер көрсеткенімен, екеуі де жүлдеге сынық сүйем қалғанда сүрініп, жарысты төртінші орынмен аяқтаған болатын.
Эстониядағы доданың жекелей бағдарламасында өнер көрсеткен 17 жастағы отандасымыз төрешілердің 234,31 ұпайына ие болып, әлем чемпионатының күміс жүлдесін жеңіп алды. Бас жүлдені 17 жастағы америкалық Илья Малинин (276,11 ұпай) иеленсе, қола жүлде 19 жастағы жапониялық Тацуя Цубоиге (233,82) бұйырды.