«Мәншүк оқулары» мәреге жетті

Атағы Алашқа ортақ батыр қыздың ерлік жолын жеткіншек ұрпаққа дәріптеу мақсатында ұйымдастырылған іс-шара Батыс Қазақстан облыстық мәдениет басқармасы мен облыстық бі­лім басқармасының қолдауымен өтті. Байқау қорытындысы Орал қаласындағы Мәншүк Мә­ме­то­ва мемориалдық музейінде шы­ғарылды.

Айта кетейік, «Мәншүк оқу­лары­ның» іріктеу туры облыстың барлық аудандарында өткен бо­латын. Байқауға қатысқан оқу­шы­лар 21 жасында қан майданда қаза тапқан қаһарман қыз­­дың өмір жолы, тағдыры, ата-тегі, саяси қуғын-сүргінге ұшыраған ата-анасы туралы мәліметтермен танысып, өздері үшін де көп ғибрат алғаны анық. Бұл жерде батырдың рухын жаңғыртып, бүкіл мұрасын сақтап отырған, осы байқауды бастан-аяқ ұйымдастырған Мән­шүк Мәметова мемориалдық му­зейі қызметкерлерінің еңбегін ерек­ше атап өту керек.

Байқаудың қорытынды ке­зе­ңі­не Қазақстан Жазушылар ода­ғының мүшесі, ақын Талап Таймасұлы, Қадыр Мырза Әлі атындағы Мәдениет және өнер орталығының қызметкері, та­нымал айтыс ақыны Айнабек Бисенғалиев, облыстық Халық шы­­ғармашылық орталығы ақпа­рат бөлімінің басшысы Айгүл Орын­ғалиева, облыстық білім бас­қар­ма­сының бас маманы Альбина Залмұқанова қазылық етті.

Байқау қатысушылары му­зей ауласындағы «Қайталан­бас Мән­шүк» ескерткішіне гүл шо­ғын қойды. Дәл осы ғи­ма­ратта Мәншүктің әкесі, Алаш арыс­тарының бірі, ақын, ұлт­тық баспасөз қайраткері, дәрі­гер Ахмет Мамытұлы 1932-1934 жылдары өз отбасымен бір­ге тұрған екен. Батыр қыздың та­ба­ны тиген топырақ байқауға қаты­сушы өрендерді де ерекше әсерге бөлегені анық.

Сонымен шара екі бағытта өтті. Бірінші кезеңде оқушылар Мән­шүк туралы ақындар жазған өлең­дерді мәнерлеп оқып жарысса, екінші кезеңде өз туындыларын ортаға салды.

Өте тартысты өткен сайыста мәнерлеп оқудан жүлделі І орынды Жәнібек ауданындағы Тегісшіл орталау мектебінен келген Дәурен Сәдиев жеңіп алды. Екі екінші орынды Ақсай қаласындағы №4 мектеп оқушысы Жансая Ілияс пен Дінмұхамед Қонаев атындағы №44 мектеп-гимназияның оқу­шысы Айару Қапиет өзара бө­ліс­ті. Ал жүлделі ІІІ орынға облыс­тық дарынды балаларға арнал­ған мамандандырылған мек­теп-интернат оқушысы Діл­наз Сағидолла, Бөкей ордасы ауда­нындағы Мәншүк Мәметова атындағы орта мектептен келген Еркенұр Ғалымжанова ие болды. Дарынды балаларға арналған ма­мандандырылған №8 облыстық мектеп өкілі Әмина Сейіткереева – «Үкілі үміт» аталымына, Те­рек­ті ауданы, Подстепный орта мек­тебінің оқушысы Дархан Мах­медов – «Жас толқын» аталымына лайық деп танылды. Қазақтың батыр қызына өз туындыларын арнаған сайыста қазылар алқасы Орал қаласындағы №50 мектеп оқушысы Инабат Рахаттың өлеңін бірінші орынға лайық деп бағалады. Екінші орын Ақ­жайық ауданы, Алмалы мек­тебінен келген Нұрлыбек Төлеу­ғалиев пен Жәнібек ауданы, Ғ.Қараш атындағы мектеп оқу­шы­сы Нұрлы Сабырғалиға бұ­йырды. Жүлделі үшінші орын­ды дарынды балаларға арнал­ған мамандандырылған №8 облыс­тық мектептен келген Алтынбек Әлібеков пен Орал қаласы, №50 мектеп өкілі Әлішер Сүндетов бөлісті. «Жас дарын» және «Жас қалам» аталымдары Ақсай қа­ла­сындағы №6 мектеп-лицей өкі­лі Әсемгүл Жұмағазиева мен Теректі ауданы, Подстепный орта мектебінің оқушысы Дархан Махмедовке бұйырды.

Жүлделі орын алған және ата­лымдарға ие болған оқушы­лар дипломдармен марапатталса, олардың жетекшілеріне БҚО та­рихи-өлкетану музейінің дирек­торы Мирболат Ерсаевтың алғыс­хаты табыс етілді. Сайыс ба­ры­сында Мәншүк Мәметованың ме­мориалдық музейіндегі жәді­гер­лермен танысып, «Батыр қыздың соңғы шайқасы» атты диорама­­сын тамашалаған оқушылар ерек­ше әсерге бөленгендерін айтты.