Бір шаңырақ астындағы мереке

Ән әуелеп, күй күмбірлеген орта­лық алаңда жәрмеңкедегі сауда да қыза түсті. Сауда дүңгіршектерінде өңір шаруаларының ет, сүт, бал, кон­ди­терлік өнімдері сатылса, келесі қатар­лар­да тері, жүн, ағаштан жасалған ұлт­тық бұйымдар мен әшекейлер көр­месі қойылды. Көрмеге «Еңбек» бағ­дар­ла­масы бойынша грант алған кәсіп­кер­дің жиырмасы түгел қатысты. 200 АЕК көлемінде грант алғандар бұл соманы өз ісін бастауға жұмсаған. Атап өтерлігі, биыл грант мөлшері екі есеге артып отыр.

Ашық аспан астында дәмхана ұйым­дастырылып, жұртшылық алаңда пісі­ріл­ген дәмі тіл үйірер кәуап пен палаудан, ыстық бауырсақтан дәм татты. Күш сынасамыз дегендерге түрлі спорт алаңдары ашылды. Сондай-ақ кішкентай балдырғандар үшін ойын-сауық алаңы ұйымдастырылып, балаларға «Эмиль» кәсіпорны тарапынан 900 балмұздақ таратылды.

– Біз үшін Бірлік күні – нағыз от­ба­сылық мереке. Алаңға балалары­мызды ертіп келдік. Мерекелік көңіл күй сезіледі, ауа райы да тамаша. Барша өңір тұрғындарын мерекемен құттықтап, бейбіт өмір, мықты денсаулық тілейміз! – дейді өскемендік Руслан Ноғайбаев.

Осы күні Достық үйінің алдындағы алаңда «Жаңа Қазақстан – мызғымас бірлік мекені» мерекелік іс-шара­сы өтті. Достық үйі мен Қазақстан хал­қы Ассамблеясының белсенділері, этно­мәдени бірлестіктер әсерлі кон­церттік бағдарлама ұсынып, ұлттық би фестивалін, «Ассамблея дастар­қаны» ұлттық тағамдардың көрмесін ұйымдастырды. Түрлі этностардың ән-билері көпшіліктің көңілін көтеріп, күшіміз бірлікте екенін көрсетті.

Айта кетерлігі, Достық үйі биыл 30 жылдық мерейтойын атап өтпек. 1992 жылы Өскеменде елдегі тұң­ғыш Достық үйі ашылып, ішінде ал­ғашқы корей, неміс, әзербайжан, татар этномәдени бірлестіктері құрылды. Бүгінде Достық үйінде 22 бірлестік орналасқан. Мерекелік іс-шаралар кешкісін Арбатта өткен «Мәдениеттер шоғыры» атты жастардың би жарысына ұласты. Дәл осындай концерт, көрмелер облыстың барлық өңірінде өтіп жатты.