Қазақстандық теннисші Анна Данилина Марокконың Рабат қаласында өтіп жатқан WTA 250 турнирінің жұптық сынында ширек финалға жолдама алды.
Қазақстан теннис федерациясының баспасөз қызметінің ақпараты бойынша, А.Данилина америкалық Ингрид Нилмен бірге бастапқы кездесуін марокколық Ясмин Каббай мен ресейлік Екатерина Казионовамен өткізді. Қазақстандық-америкалық жұп екі сетке жалғасқан ойында қарсыластарынан 6:1, 6:2 есебімен басым түскен. Бір сағатқа созылған матчта олар 11 брейк-пойнттың төртеуін пайдалана білді. А.Данилина мен И.Нилдің ширек финалдағы қарсыластары кейін анықталады.
Қазақстандық теннисші жекелей сында да бақ сынап көрген. Алайда іріктеу сайыстарының финалында ресейлік Екатерина Рейнгольдқа 5:7, 1:6 есебімен жол беріп, негізгі турнирге өте алмады.
Қазақстанның ерлер арасындағы бірінші, әлемнің 41-ракеткасы Александр Бублик Женева ATP 250 жарысының алғашқы айналымында Польша өкілі Камил Майчрзактан жеңіліп қалды – 1:6, 7:6 (7:4), 3:6.