Алматыда Тұрақты дамуға арналған инновациялар мен технологиялар бойынша БҰҰ-ның Орталық Азия экономикаларына арналған арнайы бағдарламасы (СПЕКА) жұмыс тобының 3-ші сессиясы өтті. Кездесуге қатысушылар 2021-2022 жылдардағы жұмыс қорытындыларын шығарды және тұрақты даму үшін СПЕКА инновациялық стратегиясын іске асыру тетіктерін талқылады.
Тұрақты дамуға арналған инновациялар мен технологиялар жөніндегі жұмыс тобының құрамына жоғары деңгейлі саясаткерлер, зерттеушілер және СПЕКА-ға қатысушы жеті елдің, атап айтқанда, Ауғанстан, Әзербайжан, Қазақстан, Қырғызстан, Тәжікстан, Түрікменстан және Өзбекстанның инновациялар мен технологиялар саласындағы басқа да мүдделі тараптары кіреді.
Биылғы кездесу гибридтік форматта өтті, оған еліміздің Цифрлық даму, инновациялар және аэроғарыш өнеркәсібі вице-министрі Асқар Жамбакин, Солтүстік және Орталық Азияға арналған субөңірлік бөлімшенің (SONCA) басшысы, ЭСКАТО Николай Помошников, БҰҰ Еуразиялық экономикалық комиссиясының өкілі Кристофер Ати, сондай-ақ СПЕКА мүшелері қатысты.
Сессияның ашылуында сөз сөйлеген А.Жамбакин Қазақстанда цифрлы трансформация бойынша жүргізіліп жатқан жұмыстар туралы айтып, нәтижелі шаралар арқылы еліміз онлайн қызметтерді дамыту деңгейі бойынша БҰҰ рейтингінде 11-орынға, «электронды үкіметті» дамыту индексі бойынша 29-орынға және киберқауіпсіздік деңгейі бойынша 31-орынға ие екенін атап өтті.
«Біз жаңа жүйелерді әзірлеу және мемлекеттік сервистермен өзара іс-қимылды жеңілдету үшін азаматтармен және бизнеспен қарым-қатынас арналарын кеңейту арқылы «Халық үніне құлақ асатын мемлекет» тұжырымдамасының цифрлы күн тәртібін белсенді түрде дамытудамыз. Нәтижесінде, мемлекеттік қызметтердің шамамен 95%-ы автоматтандырылып, электронды форматқа көшірілді. Қазір біз қызметтерді цифрландырудың 100% жолында тұрмыз», деді вице-министр.
Сонымен қатар А.Жамбақин өңірде бір мемлекет ғана жүргізіп отырған цифрландыру ЭСКАТО ұйымына қатысушы барлық елдің цифрлы дамуына алып келмейтінін атап өтті. Осылайша, Қазақстан заңнамалық деңгейде цифрлы құжаттарды қағаз құжаттарға теңестірсе де, біздің шетелдегі азаматтарымыз қағаз нұсқаларын қолдануға мәжбүр.
«Біз, әрине, ақпараттық қауіпсіздік және мемлекеттер қорғайтын деректерді таратпау жөніндегі барлық талапты ескере отырып, ақпараттық жүйелердің мемлекетаралық интеграциясы туралы байыпты ойлануымыз қажет. Біздің түпкі мақсатымыз – азаматтардың, бизнестің және мемлекеттік органдардың өзара іс-қимылын қарапайым және адамдарға бағдарлы ету», деп өз ойын ортаға салды ол.
Бұдан басқа, жұмыс тобының отырысы барысында Алматыда субөңірлік мамандандырылған ұйым – орнықты даму үшін цифрлы шешімдер орталығы құрылатыны белгілі болды. Оның қызметі Орталық Азия өңірін цифрландыруға бағытталады. Кездесу соңында А.Жамбакин СПЕКА қатысушыларын 2022 жылғы 28-29 қыркүйекте Нұр-Сұлтанда өтетін Digital Bridge халықаралық іс-шарасына қатысуға шақырды.