«Павлодар» арнайы экономикалық аймағында жылына 30 мың тонна реагент пен мұнай-химия қоспаларын өндіретін жаңа зауыттың тұсауы кесілді. Кәсіпорын еліміздің мұнай өндіруші және мұнай өңдеуші зауыттарын өз өнімімен толық қамтамасыз етпек. Болашақта ТМД, Еуропалық одақ, Таяу Шығыс және АҚШ елдерімен байланыс орнатуды көздейтін өндіріс орны осылайша алғашқы кезеңін бастап кетті.
Мұнай саласында жаңа құрылған зауыт негізі 3 кезеңді бастан өткермек. Оның біріншісі – реагенттер мен түрлі қоспа шығару. Одан соң жылдың соңына қарай өнім түрлерін көбейтіп, жаңа қондырғылар қойылады. Ал келер жылы толық қуаттылыққа шығады деп жоспарланған.
«Қазмұнайхим» ЖШС-на тиесілі өндіріс орны Қазақстанда мұнай-химия өнімдерін толық циклмен өндіретін алғашқы зауыт ретінде танылып отыр. Қоспалар дизельді отындар шығару кезінде және шағын көлемде өндірілетін химиялық заттардың өндірісінде қолданылады. Жылына 30 мың тонна реагент пен мұнай-химия қоспаларын шығарып, онымен еліміздің мұнай өндіруші және мұнай өңдеуші кәсіпорындарын толық қамтамасыз етпек. Одан артылған өнімді экспортқа бағыттау көзделген.
– Өңіріміздегі жүзеге асырылып жатқан технологиялық үдеріс заманауи әлемдік экономика жағдайында жылдам шешім қабылдауға мүмкіндік береді. Зауыт өнімдері нарықтың сұранысына толықтай сай. Жаңа өндіріс орны мемлекет, бизнес және ғылымның өзара әрекеттестігін іс жүзінде дәлелдеп отыр. Осындай жобаларды жүзеге асыру арқылы өндіріс саласында терең зерттеулер жүргізуге болатынын байқадық, – деді Павлодар облысының әкімі Әбілқайыр Сқақов.
Атап өтерлігі, бұл – отандық кәсіпкерлермен мұнай-химия саласында толық циклда іске асырылып жатқан алғашқы жоба. Оның ғылыми ойдың көмегімен іске асырылып жатқандығы да қуантады. Жергілікті өндіріс мамандары бұл бизнес пен ғылымның өзара бірлесуінің жарқын үлгісі деп бағалайды.
Жобаға тартылған инвестициялардың жалпы сомасы 2,5 млрд теңгені құраған. Қазіргі кездің өзінде мұнда 30 тұрақты жұмыс орны ашылды. Кәсіпорын директоры Ален Кенжебаевтың айтуынша, ағымдағы жылдың соңына таман жоғары температуралы синтез қондырғысының құрылысы жоспарлануда.
«Өндіріс орнындағы құрал-жабдықтар технологиялық регламенттерге сай орнатылған. Еліміздегі Экологиялық кодекс талаптарын негізге ала отырып, келешекте кәсіпорындағы өндіріс экологиялық бақылауда болады. Жалпы, нысан тұрғызылмай тұрып, көпшілік тыңдаулар өткізіліп, зауыттың қоршаған орта мен адамдар өміріне қаупі бар-жоқтығына қатысты мемлекеттік экологиялық сараптама жүргізілген. Барлық зерттеулердің нәтижесі оң шықты. Төрт скважина қазып, жер-асты суларын қадағалауға алдық. Технологиялық процесіміз қоршаған ортаға еш зиянын тигізбейді деп сеніммен айта аламыз», деді ол.
Зауыт басшысы, сондай-ақ Павлодар облысының мұнай-химия саласы бойынша елімізде көш бастап келе жатқан аймақтардың бірі екенін атап өтті.
Өндіріс орны жергілікті Торайғыров университетімен келісімшартқа отырып, білім беру мекемесінің жетекші ғалымдарымен бірлесе жұмыс істеуді мақсат тұтып отыр. Себебі бүгінгі таңда кәсіпорындағы жұмысшылардың денін жастар құрайды. Мұнда жас мамандарды оқыту ісіне ерекше көңіл бөлінбек.
«Павлодар» арнайы экономикалық аймағында көптеген кәсіпорындардың жұмысы жанданып келе жатқанын айту керек. Аумақта барлығы 18 өндіріс орны қызмет етіп тұр. Бұл жерде зауыттардан шығатын өндірістік қалдықтар мен сарқынды суларды тазарту үшін кәріздік тазарту жүйесі салынуда. Қазіргі күні нысанның негізгі корпус ғимараты салынып, биологиялық резервуар жабдықтарын орнату бойынша жұмыстар аяқталуға жақын.
Мұрат ҚАПАНҰЛЫ,
журналист
Павлодар облысы