Eurasian Resources Group (ERG) компаниясы әлеуметтік жауапкершілік тұрғысында Павлодар өңірінде өркенді істерді қолға алуда. Облыс басшылығы мен Еуразиялық топтың арасында биылға жалпы құны 2,6 млрд теңге тұратын әріптестік меморандумы қабылданды. Оған бұқаралық спортты дамыту, медициналық және білім беру мекемелерін жабдықтау, елді мекендерді абаттандыру тармақтары еніп отыр.
Жуырда аталған құжатқа облыс әкімі Әбілқайыр Сқақов пен Еуразиялық топтың басқарма төрағасы Серік Шахажанов қол қойды. Қаражаттың басым бөлігі қала инфрақұрылымын дамытуға, дене шынықтыру-сауықтыру нысандарының құрылысына, медициналық мекемелерді қайта жаңғырту мен білім беру саласындағы бастамаларды іске асыруға жұмсалады. Мәселен 10 колледж материалдық-техникалық базасын нығайтуға қаражат алады. Облыстағы перинаталдық мекемелердің қызметкерлерін оқыту ұйымдастырылып, өңірлік балалар ауруханасының жаңа корпусының жобалық-сметалық құжаттарын әзірлеу жоспарланған. Қолданыстағы денсаулық сақтау мекемелері жөнделеді.
Меморандумда әлеуметтік жобаларды цифрландыру да қарастырылған. Павлодар облысының аймақтық геоақпараттық жүйесі мен автоматтандырылған «112 кезекші диспетчер қызметі» ақпараттық жүйесін әзірлеуге қаржы қарастырылған.
Келісімде аймақтағы ұстаздардың біліктілігін арттыруға сеп болатын «ERG Mektepke» және «ERG колледждерге» атты бағдарламаларды жүзеге асыру да қамтылған.
– Біз өңірдің әлеуметтік-экономикалық қуатын өсіруді көздейтін жұмысымызды жалғастыра береміз. Бұл – біздің корпоративтік жауапкершілігіміздің негізі әрі қызметкерлеріміз бен олардың отбасы мүшелерінің өмір сапасын жақсартуға күнделікті қосар үлесіміз. ERG кәсіпорындары орналасқан өңірлерде қазақстандықтардың жаңа буыны жеке тұлға ретінде үйлесімді өсіп, өрлеуіне барынша ықпал ету керек, – деді ERG директорлары кеңесінің төрағасы Александр Машкевич.
Меморандум аясында ERG-дің корпоративтік бастамасы – «Tugan Qala» жобасын қаржыландыру көзделген. Бұл – шаһар тұрғындарының бастамалары мен идеяларына сарапшылармен бірлесе отырып іске асыруға мүмкіндік беретін ерекше жоба. Үздік жобаларды тұрғындар дауыс беру арқылы өздері таңдайды. Биыл бұл бойынша 16 жоба меморандумда қамтылған. Жалпы бюджеті 80 миллион теңгені құрайтын нақты бастамалар жыл соңына дейін жүзеге асырылуға тиіс.
Атап өтейік, Еуразиялық топ кәсіпорындары орналасқан өңірлерге Eurasian Resources Group құйған инвестициялардың жалпы көлемі бүгінде 1 млрд доллардан асады.
Мұрат ҚАПАНҰЛЫ,
журналист
Павлодар облысы