Ақпарат және қоғамдық даму министрлігі Мемлекет басшысы тағайындаған «Тәуелсіздік ұрпақтары» грантын ұсыну жөніндегі конкурстың басталғаны туралы хабарлайды.
2022 жылы әрбір грантқа 3 млн теңгеден 30 грант беріледі. Грант берудің мақсаты – белсенді шығармашыл жастар қауымдастығын қалыптастыруға бағытталған жастардың жаңа және қолданыстағы бастамаларын мемлекеттік қолдау. Конкурстық өтінімдерді қабылдау аяқталған кезде жасы 14-тен кем емес және 29-дан аспайтын, конкурсқа қатысуға өтінім берген Қазақстан Республикасының кез келген азаматы үміткер бола алады.
Гранттар Қазақстан Республикасының азаматына жаңа идеялар мен бастамаларды іске асыру үшін конкурстық негізде мынадай бағыттар бойынша беріледі. «Ғылым» аталымы ғылымның басым секторларында жаңа ғылыми жобаларды және зерттеулерді іске асыруға арналған. «Мәдениет» аталымы Қазақстанның мәдени мұрасын танымал етуге, халықтық мәдени дәстүрлер мен өнерді ілгерілетуге бағытталған жобаларды іске асырғандарға табысталады.
«Ақпараттық технологиялар» аталымы жаңа IT шешімдер мен жобаларды, оның ішінде жаңадан басталған стартап жобаларды іске асыруға және дайындауға арналған. «Бизнес» аталымын экономиканың басым секторларында жаңа бизнес-идеяларды іске асырғандар иеленеді. «Медиа» аталымы жаңа медиа жобаларды, оның ішінде жастар үшін танымдық, пайдалы, қызықты контент құру жөніндегі жобаларды іске асырғандарға бұйырады.
Үміткерлердің конкурстық өтінімдері (қағаз нұсқада) ағымдағы жылғы 14 тамызға дейін мына мекенжай бойынша қабылданады: Нұр-Сұлтан қаласы, Мәңгілік ел даңғылы, 8, «Министрліктер үйі» Әкімшілік ғимараты (14-кіреберіс); Байланыс нөмірлері: 8(7172)74-12-78, 8(702-000-88-12). Электронды нұсқасы generation.kaz@gmail.com поштасына қабылданады.
Конкурстық өтінімдер мемлекеттік және (немесе) орыс тілдерінде қабылданады және нысан бойынша жобаның сипаттамасы; жобаның бейне-таныстырылымы (60 секундтан аспайды); шығыстар сметасының жобасы; зияткерлік меншік туралы мәліметтер (бар болса) қамтылуға тиіс.