Интернет арқылы аса ірі көлемде есірткі сатқан 25 жастағы павлодарлық сот үкімімен 10 жылға бас бостандығынан айырылды. Бұл жөнінде ІІМ-нің баспасөз қызметі хабарлады.
Арнайы операция кезінде қала тұрғынынан сатуға арналған 78 грамнан астам тыйым салынған заттар табылып, тәркіленген болатын. Есірткі полиэтилен пакеттерге салынып, оқшаулағыш лентамен оралған. Алдын ала тергеу барысында күдікті осындай қылмыстық жолмен өзінің қаржылық жағдайын жақсарту жөнінде шешім қабылдағанын айтқан.
Қала тұрғыны синтетикалық есірткілерді сақтап, содан кейін оларды жасырын орындарға орналастырып келген. Кейіннен ол тұтынушыларға есірткі жасырылған орын және оның мөлшері туралы фото хабар беріп отырған. Сәтті жүргізілген жедел іс-шаралардың нәтижесінде, жігітті есірткі қылмысына қарсы іс-қимыл бөлімшелерінің қызметкерлері ұстап, кейіннен оған Қылмыстық кодекстің 297-бабының 3-бөлігі бойынша айып тағылды.
Қылмыстық істі сотта қарау барысында қала тұрғынының кінәсі толық дәлелденіп, сот оны 10 жылға бас бостандығынан айырды.