27 тамызда Алматыда урбанисті және экстремалды спорт түрлерінен «Almaty Urban Fest 2022» спорт фестивалі басталады. Алғашында іріктеу турнирі өтсе, одан кейін гранд-финалды тамашалаймыз. Ал жеңімпаздар мен жүлдегерлердің есімдері 17 қыркүйек күні белгілі болады.
1 100-ден аса жастың қатысуымен өтетін аталған фестиваль барысында скейтер, роллер, самокат, BMX, баскетбол (3х3), көше биі, қол күресі, воркаут, трейсер және Dota 2 киберспорттан бәсекелер ұйымдастырылады. Іріктеу кезеңі төрт алаңда өтеді. Атап айтсақ, баскетбол, стрит ворк-аут, көше биі және қол күресінің шеберлері «Алматы Аренада» өнер көрсетеді. Агрессивті ролик, кик-скутер, BMX және скейтбордингтан сайыстар Орталық саябақта өтеді. Трейсерлер 3RUNKZSCHOOL паркур мектебінде және кибератлеттер «Арена 2.0» компьютер клубында шеберлік байқасады. Ал жанкүйерлерге қолайлы болуы үшін Гранд-финалдың жалауы бір спорт алаңында, яғни «Алматы Аренада» желбірейді. Дүбірлі дода аяқталған бетте көрермендер эстрада өнерпаздарының қатысуымен өтетін концерттік бағдарламаны тамашалайды.
Алатау бөктерінде орналасқан әсем қалада Almaty Urban Fest фестивалі бұған дейін екі рет дүркіреп өткен еді. Жергілікті спорт басқармасының мұрындық болуымен 2019 және 2021 жылдары ұйымдастырылған жарыстар жоғары деңгейде өтіп, көпшіліктің қызығушылығын туғызды.