Көптің көңілінде жүрген түйткіл де тарқады. Талдықорғандағы №9 мектепке жазушы Сайын Мұратбековтың есімі беріліп, оқушылардың қуанышын еселеді. Классик жазушының атын арқалаған білім ордасы қаланың қақ ортасында орналасқан. Жетісулық қаламгерлер жақсы жаңалықтан бір желпініп қалды.
Үкіметтің 6 маусымдағы №370 қаулысына сәйкес жазушы есімін еншілеген орта мектептің салтанатты шарасына Жетісу облыстық мәслихатының хатшысы Гүлнар Қожағұлқызы, жазушының қарындасы Майра Сапарғалиқызы, Талдықорған қалалық мәслихатының хатшысы Темірболат Жанболатұлы шақырылып, кезекпен сөз алып, оқушыларды алғашқы қоңыраумен құттықтады.
Алдымен Қазақстан Республикасының Мемлекеттік Гимніне тік тұрып құрмет көрсеткен көпшілік мектеп оқушылары дайындаған концерттік бағдарламаны тамашалап, жас өнерпаздардың өнеріне ризашылық танытты. Одан соң 1-сынып оқушыларына білім кілтін табыстаған 11-сынып оқушысы, «Алтын белгіге» үміткер Нұрай Нұрқапарова артынан ерген іні-сіңлілеріне жүрекжарды тілегін арнады. Одан кейін ардагер ұстаздар ақ тілегін арнап, жаңа оқу жылының басталғанын хабарлады.
Қаламгер есімін иеленген №9 орта мектептің салтанатты ашылу рәсіміне орай келген қонақтар лента қиып, оқу орнының отандық білімге өлшеусіз үлес қосуына тілектестік танытты. Қонақтарды шашумен қарсы алған әжелер де шара шырайын кіргізді.
Мектеп директоры Ләйлә Сембаеваның айтуынша, жазушы Сайын Мұратбековтың аты берілген орта мектептің 1-сыныбына 238 оқушы барыпты. Одан бөлек, мектепте 1 797 оқушы білім алады. Ұстаздық қызметті атқаратын 137 мұғалімнің 60 пайызы жаңа тестілеуден өтіп, білімі жоғары екендігін дәлелдеген. Мектеп түлектері биыл Ұлттық бірыңғай тестілеудің нәтижесі бойынша 86 пайызды көрсеткен.
Жетісу облысы