Жаңа Жолдау Мемлекет басшысының реформаларға бағытталған саясатының табысты жүзеге асырылып жатқандығын растайды. Әлеуметтанушылар зерттеулерінде қоғамның әділеттілік пен мемлекеттік саясаттың ашық болу керектігін сөз етеді. Осы екі мәселе Мемлекет басшысы Қ.Тоқаевтың саясатынан көрініс тапқанын атап өту керек.
Негізгі басым бағыттардың бірі – балалар болашағының жарқын болуы. Жыл басында жарияланған Балалар жылы өте маңызды, дұрыс шешіммен аяқталып отыр. Мемлекет басшысы 2024 жылдан бастап Ұлттық қордың жылдық инвестициялық кірісінің 50 пайызын балалар шотына 18 жасқа дейін алдын ала алу құқығынсыз аударып отыруды ұсынды. Іс жүзінде бұл іс-шара қазақстандықтардың «экономикалық төлқұжатын» қалыптастыру болып саналады. Мұндай тәжірибе әлемнің бірқатар елінде бар және ол болашақта балаларға еліміздің материалдық ресурстарын пайдаланғаны үшін төлем алуға мүмкіндік береді. Бұл – қоғамдағы сұранысқа ие қадамдардың бірі.
Ұлттық қордың болашақ ұрпаққа арналған қор екені бірнеше рет айтылды. Болашақ ұрпақ бұл шешімді тек абстрактілі категория деп түсінбей, шын мәнінде, 18 жасқа толған кезде белгілі бір бастапқы капиталға ие болатынына сенімді болуы керек. Қаржыны қайда жұмсайтынын әр жас өзі анықтайды. Білім алуға жұмсай ма, жылжымайтын мүлік ала ма немесе автокөліктерге инвестиция құя ма – оны өзі шешеді.
Жалпы, Қасым-Жомарт Тоқаевтың ұстанымы абсолютті прагматизммен, шешімдерге салмақты көзқараспен және популизмнен бойын аулақ салуымен ерекшеленеді. Бұл – қазіргі қиын кезеңде ең дұрыс стратегия.
Жұлдызай ЫСҚАҚОВА,
саясаттанушы