Алматыда БАҚ өкілдері бас қосқан «Журналистер БАҚ тәуелсіздігі мен кәсібінің қауіпсіздігі жолында» тақырыбындағы жиында елімізде журналист мәртебесін көтеру, бұқаралық ақпарат құралдарының ашықтығына қатысты пікірлер айтылды.
Журналистердің халықаралық ынтымақтастығы күніне орай өткен жиын барысында Қазақстандағы Нидерланд Корольдігі елшісінің орынбасары Наут ван Вауденберг сөз бостандығы, адам құқығы, азаматтық қоғамды дамытуға қатысты пікір білдіріп, құттықтау сөзін арнады.
Төртінші билік өкілдерін толғандырып отырған көкейкесті мәселелерге қатысты сұрақтарға Ақпарат және қоғамдық даму министрлігі БАҚ саласындағы мемлекеттік саясат департаментінің директоры Жасұлан Өмірәлиев жауап беріп, «Медиа заңнаманы жетілдіру еліміздің саяси модернизациясының кешенді маңызды бөлігі» тақырыбына баяндама жасады. Баяндамасында ол БАҚ туралы заң жобасында қамтылып отырған мәселелерге тоқталды.
Осы орайда «Әділ сөз» сөз бостандығын қорғау халықаралық қорының директоры Тамара Калеева азаматтық қоғам өкілдері тарапынан ұсынылған бірқатар мәселенің ескерілмей отырғанын жеткізді. Бұл айтылғандардың қатарында БАҚ-тың бәсекеге қабілеттілігін арттыруға кедергі келтіретін жайттар бар.
Г.Бендицкий атындағы қордың директоры Сапа Мекебаев журналистік зерттеулердің шынайылығы әрі ашықтығы, әрбір медиа өкілінің өз ісіне адалдығы, тапсырыспен жазылған мақаланың журналистің атына сын екенін атап өтсе, «Сапмар» ЖШС директоры Марат Асипов мемлекеттік ақпараттық тапсырысқа қатысты мәселелерге тоқталды. Ал медиа заңгер Игорь Лоскутов журналистердің қауіпсіздігіне кепілдік беретін халықаралық стандарттарды енгізу мәселесін көтерді. Осы орайда тәртіп сақшыларын даярлайтын жоғары оқу орындарында арнайы курстар енгізуді ұсынған сарапшы бұл бағыттағы ақпараттар БАҚ өкілдеріне құрметпен қарауға ықпал ететіндігін айтты.
Нарықтағы меншік мәселесі, мемлекеттік медианы қаржыландыру, демонополизация мәселесін қозғаған Internews медиа заңгері Ольга Диденко медианы сенімді институт ретінде қарастыра келіп, сапалы контентті күшейтуде өзін-өзі реттеу тұрғысынан алғанда мемлекеттік басқару, қоғам және бизнеспен тығыз әріптестікте нәтижелі реформаларға қол жеткізуге болатынын атап өтті.
«Түркітілдес журналистер қорының» президенті Нәзия Жоямерген баяндамасында еліміз өңірлері бойынша жүргізген әлеуметтік зерттеулерге тоқталды. Сарапшының айтуынша, жауап бергендердің 97 пайызы БАҚ-та жариялауға рұқсат етілмейтін тақырыптардың бар екендігін алға тартқан. Бұл, әсіресе билік өкілдерінің әрекетіне, жемқорлыққа қатысты зерттеулерге байланысты. Ал сауалдамаға қатысқан журналистердің 92 пайызы мақала жазу барысында кейбір әкімдіктер тарапынан қысым көрсетілетінін, аймақтардағы журналистердің жалақысының аздығы бюджеттік қолдау мен демеушілердің қаржысына тәуелді ететінін атап өткен. «Осы орайда мемлекеттік тапсырыс толығымен ашық болу қажет», деген PR-маман Әсел Қараулова жарияланатын материалда тапсырыспен жазылғандығы жайында мәлімет көрсетілуге тиіс екендігін алға тартты.
Дөңгелек үстелде, сонымен қатар Байланыс және ақпарат жөніндегі маман Сергей Карпов ЮНЕСКО-ның баспасөз бостандығы, журналистердің, оның ішінде әйел журналистердің қауіпсіздігіне байланысты ақпараттардың қолжетімділігіне тоқталды. Әсіресе мемлекет пен БАҚ арасындағы ашық әрі әділ байланыстарды қолдау бағытындағы іс-шараларға мән беріліп келеді.
Дөңгелек үстелге қатысушылар журналистердің қоғамдағы рөлі, қауіпсіздігі, «блогер», «коммуникация» ұғымдарына қатысты мәселелермен қатар баспасөз өнімдерін тарату, қосымша құн салығы, қала, аудан орталықтарында жойылып кеткен газет дүңгіршектерін жандандыру мәселесін қозғады.
АЛМАТЫ