Президент Қасым-Жомарт Тоқаевтың халыққа Жолдауында берілген тапсырмасы бойынша Парламентте қаңтар оқиғасы кезінде жаппай тәртіпсіздікке қатысқандарға рақымшылық жариялау жөнінде заң жобасы дайындалған еді. Сол құжатқа Мемлекет басшысы қол қойды.
Бұл – әрине, еліміз, халқымыз елеңдеп тосып отырған заң. Кешегі қаңтар оқиғасы ел тарихындағы аса ауыр, жүрегімізге үлкен жүк салған, көңілімізге ой салған оқиға болғаны белгілі.
Құжаттың маңызы мынада. Заң жобасы мыңдаған адамның тағдырына әсер етеді. Осы құжат бойынша 1 500 адамға рақымшылық жарияланады. Аса ауыр және ауыр кінәсі барлардың жазасы жеңілдетіледі. Ауыр кінәсі бар адамдарға жазасының төрттен үш бөлігі, аса ауыр кінәсі бар адамдардың жазасының жартысы қысқарады. Бұл рақымшылық қаңтар оқиғасын ұйымдастырғандарға, террористерге, рецидивистерге, сондай-ақ қаңтар оқиғасына қатысқандарды азаптағандарға қолданылмайды.
Әрине, бұл – ел тағдыры. Жастардың тағдыры. Мемлекеттің болашағы – жастар. Президенттің жаппай тәртіпсіздікке еріп кеткен жастарымызға рақымшылық жасау жөніндегі заңға жеделдетіп қол қоюы халықтың көңіліне қуаныш ұялатады. Алдағы уақытта мемлекетіміздің болашағы нық, сенімді, айқын болуы үшін жастарымызды мемлекетшілдікке, отансүйгіштікке, мемлекеттің әрбір құндылығына үлкен сүйіспеншілік көзқараспен қарауға тәрбиелеуіміз керек.
Аманжол ӘЛТАЙ,
Мәжіліс депутаты