Кеше шорт-тректен Қазақстанның ұлттық құрама командасын жанкүйерлер, федерация қызметкерлері, туған-туыстары Астананың Халықаралық әуежайынан гүл шоқтарымен күтіп алды.
Расында да, осы спорт түрін серік еткен жігіттеріміз ондай құрметке лайық екені даусыз. Күні кеше ғана Канаданың Монреаль қаласында аяқталған Әлем кубогінің кезеңдік сайысында олар үш жүлде жеңіп алды. Атап айтсақ, Абзал Әжіғалиев пен Денис Никиша 5 000 метрлік қашықтықта күміс алса, Әділ Ғалиахметов 1 000 метрлік бәсекеде қолаға қол созды. Ал оның алдында ғана АҚШ-тың Солт-Лейк-Сити қаласында Қазақстан құрамасы 5 000 метрлік эстафеталық сайыста мәре сызығын екінші болып қиып өткен еді.
Шорт-трек шеберлерінің дүбірлі додалары енді ғана қызып жатыр. Кеше дәл сол Солт-Лейк-Ситиде тағы бір байрақты бәсеке басталды. «Төрт құрлықтың турнирінде» қазақстандықтар да ел намысын қорғауда.