Таяуда штаб-пәтері Лондонда орналасқан Ұлыбританияның talkSPORT басылымы өздерінің спорттық мансабында бірде-бір рет жеңілістің кермек дәмін татпаған кәсіпқой боксшылардың рейтингін жариялады. Үздіктер көшін атағы алысқа жайылған АҚШ-тың апайтөсі Флойд Мейвезер бастап тұр.
1977 жылдың 24 ақпанында АҚШ-тың Мичиган штатына қарасты Гранд-Рапидс қаласында дүниеге келген Флойд Мейвезер жайында төрткүл дүние жанкүйерлері алғаш рет 1996 жылы Атлантада алауы тұтанған XXVI жазғы Олимпия ойындары кезінде естіген еді. Аталған жарыстың тұсаукесер кездесуінде ол Бақтияр Тілегеновті тізе бүктірді. Сол кезде Азия чемпионы деген дардай атағы бар қандасымыздың 19 жастағы есімі көпшілікке беймәлім былғары қолғап шеберіне есе жібергеніне көңіліміз толмаған еді. Бірақ мұнымыз бекер екен. Одан кейін жас дарын армениялық Артур Геворкян мен кубалық Лоренцо Арагонды жолынан ығыстырды. Ақыры жартылай финалда Болгарияның даңқты боксшысы, үш дүркін әлем және Еуропа чемпионы Серафим Тодоровқа бір ғана ұпай айырмашылығымен ұтылған Флойд қола медальды мойнына ілді.
Атланта Олимпиадасы аяқталған бетте кәсіпқой рингте күш сынасуға бел буған АҚШ боксшысы содан кейін бірде-бір рет жеңілістің кермек дәмін татқан емес. 1996-2021 жылдар аралығында 50 рет шаршы алаңға шыққан ол барлық бәсекеде басым түсті. 27 қарсыласын нокаутқа жіберді. Мейвезерден таяқ жегендер арасында Диего Кораллес, Хосе Луис Кастильо, Демаркус Корли, Артуро Гатти, Шармба Митчелл, Заб Джуда, Карлос Мануэль Бальдомир, Оскар де ла Хоя, Рикки Хаттон, Хуан Мануэль Маркос, Шейн Мосли, Виктор Ортис, Мигель Котто, Роберт Герреро, Сауль Альварес, Маркос Майдана, Мэнни Пакьяо сынды даңқтары жер жарған боксшылар бар. Ол аз десеңіз, осыдан бес жыл бұрын Лас-Вегастағы «Ти-Мобайл Аренада» Флойд ережесіз жекпе-жектің хас шебері Конор Макгрегорды техникалық нокаутпен ұтты. Ширек ғасырға жуық уақыт бойы қарсы келгендерді қоғадай жапырып, ХХІ ғасырдың теңдессіз боксшысы деп танылған Мейвезердің үздіктер рейтингінде көш бастап тұруға лайықты екені еш дау туғызбаса керек.
Үздіктер тізімінде екінші орынды Рикардо Лопес иеленуде. Жеңіл салмақ дәрежелерінде өнер көрсеткен Мексиканың марқасқасы 1985-2001 жылдар аралығында 52 кездесу өткізіп, 51 рет жеңіске жетті. 38 бәсекеде айқын басымдық танытты. 1998 жылы никарагуалық Росендо Альвареспен болған жекпе-жекте тең есеп тіркелді. Негізі Лопес оны да ұтатын еді. Бірақ 8 раундта америкалық спортшының қабағы жарылып кетті. Бәсеке дереу тоқтатылды. Төрешілер біраз ойлана-толғана келе жоғарыдағыдай шешім қабылдады.
Үшінші сатыға Рокки Марчиано жайғасты. ХХ ғасырдың бел ортасында шаршы алаңды шайқаған АҚШ боксшысы 49 кездесудің барлығын өз пайдасына шешті. 43 қарсыласын есінен тандырды. Сондай-ақ ТОП-10 боксшының қатарына Джимми Бэрри (59-0-10), Джо Кальзаге (46-0), Андре Уорд (32-0), Теренс Кроуфорд (38-0), Тайсон Фьюри (32-0-1), Свен Оттке (34-0) және Александр Усик (20-0) сынды саңлақтар енді.