Таразда қазақ музыкасының корифейі, «Жайлаукөл кештері», «Еділ мен Жайық», «Даниярдың әні», «Жәмиләнің әні» секілді көптеген туындылары ән әлемінде алтын әріппен жазылған Қазақстанның Еңбек Ері, даңқты композитор Ілия Жақановтың «Жайлаукөл кештері» атты шығармашылық кеші өтті.
Іс-шара барысында Баласағұн атындағы орталық концерт залға жиналған жұртшылыққа үш бірдей жинақ таныстырылды. Жаңадан жарық көрген кітаптардың қатарында өнер жанашыры Қанат Ордабаевтың демеушілігімен жарық көрген Ілия Жақановтың шығармалары енген «Жайлаукөл кештері» атты жинақ бар. Одан бөлек, жазушы-журналист Қали Сәрсенбайдың қаламынан туған «Дүлдүл», Ілия Жақановтың өзі жазған «Таңғажайып махаббат» секілді жинақтар да оқырман үшін үлкен олжа екені рас.
Ілия Жақановтың жан тебірентетін әндерімен әдіптелген кеш барысында өңір басшысы Нұржан Нұржігітов сөз алып, дарабоз тұлғаға ізгі тілегін жеткізді.
«Қазақтың байтақ даласын ән-күйге бөлеген Біржан сал, Ақан сері, Құрманғазы, Ықылас, ХХ ғасырдың корифейлері Шәмші мен Нұрғиса секілді өнер дүлдүлдерінің қасиетті жолын жалғаған қазақтың маңдайалды композиторымен қай кезде де мақтанамыз», деді облыс әкімі.
Кеш барысында өнер жұлдыздары композитордың халыққа кең тараған әндерін шырқады. Көрерменнің есіне кезінде хит болған әндерді салды. «Жайлаукөл кештері» сағыныштың сазына айналды.
Тараз