Президент жанындағы Әйелдер істері және отбасылық-демографиялық саясат жөніндегі ұлттық комиссия биыл 32 маңызды іс-шара өткізді. Бұл жөнінде Орталық коммуникациялар қызметі алаңында өткен брифингте кеңінен мағлұмат берілді.
Ұлттық комиссия төрағасының орынбасары, Парламент Сенатының депутаты Ләззат Сүлейменнің айтуынша, елдегі күрделі әлеуметтік мәселелерді шешудің тиімділігін арттыруға және азаматтық қоғаммен өзара іс-қимылды кеңейтуге бағытталған біршама жұмыс атқарылды. Әрбір басымдық бойынша сараптамалық топтар құрылды, жаңа тәсілдер қабылданды, комиссияның жұмысын ретке келтіретін, секторлардың жұмысын және оның мүшелерінің қызметін бағалауды айқындайтын регламент бекітілді.
«Балалар жылы балалардың құқықтары мен мүдделерін қорғау мәселесі басты назарда болды. Осы мақсатта арнайы жоспар әзірленіп, онда 65 жүйелі іс-шара қамтылды. Күрделі әлеуметтік мәселелер бойынша 18 өңірге ұлттық комиссияның мониторингтік тобының сапары ұйымдастырылды. Олар перзентханаларға, перинаталдық орталықтарға барып, қатардағы дәрігерлермен және босанатын әйелдердің өзімен тікелей байланыс орнатып, өңірлерде ана мен бала өлімінің өсу себептерін егжей-тегжейлі зерттеді. Бұл жұмысқа акушерлік, гинекология және перинатология саласындағы сарапшылар, еліміздің медициналық жоғары оқу орындарының белгілі ғалымдары тартылды», деді спикер.
Оның айтуынша, балаларды зорлық-зомбылықтан қорғау суицидтің алдын алу және балалардың құқықтары мен әл-ауқатын қамтамасыз етудің 2023-2025 жылдарға арналған кешенді жоспары әзірленді. Балаларға қатысты зорлық-зомбылық фактілері бойынша жедел әрекет ету алгоритмі жасалды. Алгоритм негізінде ведомствоаралық ден қою жүйесін күшейтуге мүмкіндік беретін және жергілікті жерлерде уәкілетті органдардың тиімді жұмысын қамтамасыз ететін жұмыс тобы құрылды.
«Ұлттық комиссияның азаматтық қоғам құрылымдарымен сындарлы диалогі белгіленді. Бүгінгі таңда отбасылық-гендерлік проблемамен айналысатын 500-ге жуық ҮЕҰ жұмыс істейді. Азаматтық сектормен бірлесіп жұмыс істеуде тұрмыстық зорлық-зомбылықтың алдын алу мәселелері ерекше өзекті болып отыр. Бұл бағытта «Отбасында – зорлық-зомбылықсыз Қазақстан» жобасы жүзеге асырылуда. Қазақстан – ішкі істер органдары жүйесінде әйелдерді зорлық-зомбылықтан қорғау жөніндегі бөлімшелер құрылған посткеңестік елдердің бірі. Әйелдерге қарсы жасалған зорлық-зомбылық қылмыстарын ең тәжірибелі әйел тергеушілер зерттейді. Мұндай тәжірибе қылмыстарды тезірек және тиімді ашуға ықпал етеді», деді Л.Сүлеймен.
Сонымен қатар ұлттық комиссия «Мерейлі отбасы» ұлттық байқауын, әкелердің республикалық форумын, ауылдағы әйелдердің республикалық форумын өткізді. Әйелдер мен қыздардың басқарушылық әлеуеті мен саяси мәдениетін дамыту мақсатында «Томирис» жобасы іске асырылып жатыр.
«Қазақстанның дамуының жаңа кезеңіндегі отбасылық-демографиялық және гендерлік саясат» тақырыбындағы халықаралық ғылыми конференция Қазақстан, Чехия, Швейцария, Үндістан және АҚШ ғалымдары мен сарапшыларын, сондай-ақ Парламент депутаттарын, орталық және жергілікті атқарушы органдар, ҮЕҰ және халықаралық ұйымдар өкілдерін, жалпы 300-ге жуық қатысушының басын қосты. Конференция қорытындысы бойынша Үкімет пен жергілікті атқарушы органдардың құрылымдары пайдаланатын ғылыми негізделген сараптамалық талдау әзірленді.
Биыл жүргізілген жұмыстардың нәтижесінде Қазақстан Дүниежүзілік экономикалық форумның гендерлік теңдік бойынша көрсеткіштерін жақсартты, дәлірек айтқанда, 80-орыннан (2021 жыл) биыл 65-орынға дейін көтерілді.