Қазақстан Республикасы Президентінің Әкімшілігі мен қалалық мәслихат депутаттарының келісімі бойынша Мейрам Мұратұлы Қожухов Қарағанды қаласының әкімі болып тағайындалды, деп хабарлайды Egemen.kz.
Өңір басшысы Ермағанбет Бөлекпаев қалалық мәслихаттың кезектен тыс сессиясына қатысып, әкімдікке кандидатты таныстырды. Депутаттар оны қолдады.
«Мейрам Мұратұлы ұзақ жылдар Қарағандыда қызмет етті. Барлық сұрақтармен таныс. Ең бастысы, оны қала тұрғындары жақсы біледі. Жинаған тәжірибесі мен білімі оның қаланың әлеуметтік-экономикалық дамуы үшін әлеуетін жүзеге асыруға көмектеседі деп ойлаймын. Сіздердің басымдықтарыңыз қарағандылықтар үшін қолайлы жағдай жасау болуы тиіс», деді аймақ басшысы.
Ермағанбет Бөлекпаев жаңа әкімге инфрақұрылымды одан әрі дамыту және жылу беру маусымының кедергісіз өтуін қамтамасыз ету бойынша міндеттерді тапсырды.
Мейрам Қожухов 1972 жылы дүниеге келген. 2001 жылдан бастап мемлекеттік қызметте. Саран қаласының мәдениет, жастар саясаты, спорт және туризм бөлімінің бас маманы болды. Ақтас ауылының әкімі, Саран қаласы әкімінің орынбасары, Қарағанды қаласы Октябрь ауданының әкімі қызметтерін атқарған.
2022 жылдың сәуірінен осы уақытқа дейін Қарағанды қаласы әкімінің орынбасары қызметін атқарды.