Ұлт асылдарының бірі Жүсіпбек Аймауытұлы заманында он саусағынан өнері тамған шебер болыпты. Өз қолымен жасаған ағаш сызғышы, сия сорғышы жергілікті музейде қаз-қалпында сақтаулы тұр.
Павлодар облыстық Бұқар жырау атындағы әдебиет және өнер музейін аралап жүріп, Ж.Аймауытұлына қатысты кейбір жәдігерлерге еріксіз назар аудардық. Әсіресе Алаш ардақтысы үнемі жанынан тастамаған «Насихат» қалта сағаты, қағаз кесуге арналған сызғыштар, «Сюзанна» кілемі және ағаштан жасалған сиясорғыш. Музей қызметкері Әлия Саматова бұл заттардың кейбірін кезінде Жүсіпбектің өзі жасап, күнделікті жұмысында пайдаланғанын атап өтті. Көне заттар өте қарапайым әрі іс білетін шебер адамның қолынан шыққаны байқалады. Бұл бұйымдарды 90-жылдары музей ашылғанда қаламгердің қызы Мәруа Жүсіпбекқызы қорға тапсырыпты. Алаштың арда азаматынан қалған құнды заттарды ұрпақтары көзінің қарашығындай сақтап, қаншама уақыт сандықтың түбінде жасырып келгені таңғалдырады.
Мәруа Аймауытова естелігінде айтып қалдырғандай сызғыштар мен сия сорғышты әкесі өзі жасап, ою-өрнекпен оқалаған. «Анамның айтуынша, кей-кейде әкем қатты ойға шомған уақытта осы сиясорғышқа қолын қойып, әрі-бері теңселтіп отыратын болған. Бұл затты да өз қолымен жасаған. Мұндағы бейнелерге назар аударсаңыздар, онда баласын тамақтандырып отырған құстың суреті бейнеленген. Әкемнің қолынан шыққан қандай туынды болсын, оның әрбірінде қазақтың философиялық терең мазмұны жатыр. Ал қалта сағатын жанынан тастамаған. Күндіз қоғамдық жұмыстар атқарып, түн ауа шығармашылықпен айналысқан. Әкемнің сағатқа жиі қарайтын әдеті болыпты. Уақытының, өмірінің аз қалғанын сезсе керек...», депті ұлы тұлғаның ұрпағы өз естелігінде.
Әкесінің жатын бөлмесінде үнемі ілініп тұрған «Сюзанна» кілемі де жақсы сақталған. Оны кезінде Бұқара қаласынан арнайы алдырыпты, бұқарлық шеберлердің туындысы көрінеді.
Павлодар облысы