Инфляция төмендей ме?

«Ресейде жылдық инфляция сәуір­де 1,56 пайызға дейін баяула­ды (наурыздағы 3,51 пайызбен салыс­тырғанда). Аталған елдегі инфля­цияның күрт төмендеуі Қа­зақ­стандағы инфляцияның баяулауы үшін жағымды фактор болып есептеледі. БҰҰ азық-түлік жә­не ауыл шаруашылық ұйымы (ФАО) индексінің орташа мәні сәуір­­де ұлғайып, 127,2 пункт болды. Нау­рыздағы көрсеткіштен 0,6 пайыз­ға жоғары. Бұл жылдық төмен­деуден кейінгі азық-түлік тауарлары бағасының алғашқы өсуі. ФАО азық-түлік бағасы индексінің айтарлықтай өсуінің маңызды факторы – қант бағасының қымбаттауы болды. Астық, сүт өнімдері бағаларының индексі төмендеуді жалғастырды. ФАО индексінің бұлай жоғарылауы әлемдегі дезинфляциялық үдерістің тұрақсыздығынан хабар береді», деп мәлімдейді орталық кезекті шолуында.

Олардың айтуынша, еуроаймақта­ғы жылдық инфляция сәуірде 7 пайыз­ға дейін артты. Бұл – бес ай­лық төмендеуден кейінгі алғашқы өсім. Қа­зақстанның маңызды сауда се­ріктесі – ЕО-дағы инфляция өсімі – әлемнің алдыңғы қатарлы эконо­микасындағы төмендеудің орнық­сыздығын байқатады.

«Қытай экономикасының ашылуы мұнайға деген жоғарғы сұраныс үмітін ақтамады. Қазір «қара алтын» бағасы барреліне 75 доллардың маңайында саудалануда. ОПЕК+ елдерінің мұнай өндірісін ерікті түрде төмендетуі, соның ішінде өндірістің Қазақстанда тәулігіне 78 мың баррельге қысқаруы мұнай бағасы өсіміне ұзақ мерзімді эффект бере алмады. Аталған фактор ұлттық валюта бағамына қысым жасай отыра проинфляциялық факторға айналуы әбден мүмкін. Қазақстанда жылдық инфляция наурыз-сәуірде төмендеуді жалғастырды. Алайда сыртқы және ішкі факторлар динамикасы аталған дезинфляциялық үрдістің тұрақты емес екенін байқатып отыр. Көп жағдайда Қазақстандағы жылдық инфляцияның төмендеуі жоғары базалық әсерге байланысты, ал ай сайынғы инфляция жоғары қарқынмен өсуін жалғастыруда», делінеді шолуда.

Қаржы министрі Ерұлан Жамау­баевтың айтуынша, Қазақстан инфляцияны екі есе төмендету межесін орындай алады.

«Бізде былтыр инфляция 20 пайыздан асып кетті. Биыл ол цифрды кем дегенде екі есе төмендеткіміз келеді. Ар­найы  кешенді жоспар әзірлеп отырмыз. Онда ішкі нарықтағы отан­дық тауарлардың пайызын жоғары­лату көзделген. Осы жоспарды орындау үшін тиісті бюджет қаражаты бөлінеді. Сонымен қатар инвестиция да тартамыз. Қазір тауарларды сақтау және та­сы­малдау тетігін жақ­сарту жоспарланып жатыр. Көп жағ­дай­да өндірушілер өндірген тауар­лар тұтынушыға тиісті сап­а­­да жет­пейтіндіктен бұлай істеудің қажеттілігі жоғары болып тұр», дейді министр.