«Egemen Qazaqstan» газетінің қарашаңырағында бауырлас Түркия еліндегі «Түркі ошақтары» тарихи-мәдени қоғамының өкілдері қонақта болып, бас басылымның тыныс-тіршілігімен танысты.
«Түркі ошақтары» қоғамдық ұйымы 1912 жылы құрылып, содан бері жұмыс істеп келеді. Мақсаты – түркі тектес халықтардың бірлігін сақтап, олардың руханияты мен мәдениетін насихаттау. Негізінен ұйым мүшелері – зейнеткерлер. Олардың арасында бұрын мемлекеттік қызмет атқарған қоғам қайраткерлері, педагогтер, инженерлер, әскери азаматтар, қысқасы, барлық саланың мамандары бар. Кездесуде аудармашылық қызметті Ғылым және жоғары білім министрінің кеңесшісі Рахымбек Жолаев сәтімен атқарды.
Алыстан ат арытып келген қонақтарды жылы қарсы алған «Қазақ газеттері» ЖШС бас директоры, академик Дихан Қамзабекұлы серіктестіктің қызметі мен ғасырдан астам тарихы бар «Egemen Qazaqstan» мен «Казахстанская правда» басылымдары туралы кеңірек мағлұмат берді.
– «Egemen Qazaqstan» – еліміздегі бас газет. Басылым тарихы 1919 жылдан басталады. Осыдан төрт жыл бұрын жүз жылдығын атап өттік. Бұл газетті басқарған азаматтардың біразы отызыншы жылдардағы қуғын-сүргін құрбаны болды. Биылдан бастап «Қазақ газеттері» болып құрылып, оған елімізде шығатын 12 газет-журнал біріктірілді. Біз Түркия елімен өте жақын байланыстамыз. Одан әрі де тығыз байланыста болғымыз келеді. Түбіміз бір жұртпыз. Түркияның медиа саласындағы тәжірибесі, сол салада қызмет істейтін мамандардың ізденістері бізге қажет. Қазір біздің журналистер, әсіресе жас журналистер Түркияға барып, тәжірибе үйренгісі келеді, – деді бас директор.
Одан кейін сөз алған «Түркі ошақтары» қоғамдық ұйымы Анталия филиалының төрағасы Абдулла Койсар ізгі ілтипат көрсеткен басылым басшылығына ризашылығын білдіріп, біздің елден алған әсерімен бөлісті.
– Қазақ халқы жетпіс жылдан аса уақыт кеңес одағының құрамында болғанымен, ұлттық болмысы мен салт-дәстүрін, мәдениетін жоғалтып алмаған. Тәуелсіздік алғаннан кейінгі кейінгі отыз жылдағы жеткен жетістіктеріңізге көңіліміз толады. Оны өзіміз көзімізбен көріп отырмыз. Біздің мақсатымыз – әлемнің қай жерінде түркі жұрты бар, солармен жақын араласып, әдебиетімізді, мәдениетімізді дәріптеу. Қазақ еліндегі ұлттық идеяны мұрат тұтқан Алаш азаматтары туралы көп естідім. Біз түріктердің алаш-ордашыларымыз. Қысқасы, жер бетіндегі түркі халықтарының бірлігін қалай қалыптастырамыз деген идеяның жолында жүрген азаматтармыз, – деді ол.
Кездесуде қонақтар екі елдің тарихы мен руханияты, әдебиеті, мәдениеті тақырыбында сөз қозғап, еркін әңгіме өрбітті. Аударма мәселесі туралы жақсы ойлар айтылды. Қазақ зиялылары жайындағы көптеген тың дерекке қанықты.
«Астанадағы «Бәйтерекке» шығып, қолымызды қойып, түркі халықтарының бірлігіне қызмет істейміз деп ант бердік. Бірақ бір-біріміздің тілімізді қиналып түсінеміз. Осы кедергіні қалай жоямыз? Әлде бір-бірімізге жиі келіп, жақын араласуымыз керек пе?» деген қонақ сауалына Дихан Қамзабекұлы: «Бүгін бір-бірімізді түсініп отырмыз. Алайда біз бір-бірімізді жақын түсінуіміз үшін айтулы тұлғаларымызды танытып, екі халыққа ортақ дүниелерді көп насихаттауымыз керек», деп жауап берді.
Сондай-ақ кездесу барысында Абдулла Койсар биыл Түркияда болған жер сілкінісіне үлкен қолдау көрсеткен қазақ халқына ризашылығын жеткізді. «Түрік ошақтары» қазақ классикалық әдебиетін түрік тіліне аударуға атсалысатынын мәлімдеді.