Облыс әкімі Ермағанбет Бөлекпаев 90 жасқа толған көрнекті академик, танымал ұстаз, қоғам қайраткері Зейнолла Молдахметовті қабылдап, мерейтойымен құттықтады. Аймақ басшысы ел Президенті Қасым-Жомарт Тоқаевтың құттықтау хатын жеткізді. Сәулелі сәт әрмен қарай Е.Бөкетов атындағы Қарағанды университетінде ұйымдастырылған ғылыми конференцияға жалғасты.
Мемлекет басшысының құттықтау хатында «Торқалы тоқсан жасқа толған мерейтойыңыз құтты болсын! Халқымыз өзіңізді көрнекті ғалым, ұлағатты ұстаз, ұлтжанды азамат ретінде жақсы біледі және құрметтейді. Еліміздің оқу-ағарту саласын дамытуға қосқан үлесіңіз өте мол. Ұзақ жылғы ғылыми-педагогикалық қызметіңіз және бойыңыздағы асыл қасиеттеріңіз Сізді абырой биігіне көтерді», делінген.
– Зейнолла Молдахметов қарағандылықтарға ғана емес, бүкіл республикаға танымал және елімізде зор беделге ие. Ол – білім, ғылым және жалпы рухани даму саласында бірегей тұлға. Ғылым мен қоғамның дамуына бұлайша үлес қосу екінің бірінің қолынан келмейді, – деді қоғам қайраткері Бірғаным Әйтімова.
1980 жылы Зейнолла Молдахметов Қарағанды мемлекеттік университетінің тізгінін өзінің аға-ұстазы Евней Бөкетовтен кейін алған. Университет тарихындағы екінші ректор. Атақты Евней Арыстанұлынан бата алып бастаған жауапты қызметін сегіз жыл атқарады. Басшылық еткен жылдары физика-математика факультетінің оқу-лабораториялық корпусы мен студенттер мәдениет сарайы, оқытушыларға арналған сексен пәтерлік тұрғын үй бой көтерді. Сондай-ақ қаланың оңтүстік-шығысындағы университет қалашығы мен биология факультетi ғимаратының құрылысы басталған. Ғалымның тұсында осындай игілікті шаралар қолға алынып, жүзеге асқан.
З.Молдахметов 350-ден астам ғылыми еңбек, 6 монография жазды. Физикалық химия саласында маңызды зерттеулер жүргізген. Ғылым саласындағы жемісті және көпжылдық еңбегі үшін Еңбек Қызыл Ту, «Құрмет белгісі» ордендерінің лауреаты атанды. «Ерен еңбегі үшін» және «Қазақстан ғылымының еңбек сіңірген қайраткері» медальдарымен марапатталған.
Ол 1933 жылдың 3 тамызында Солтүстік Қазақстан облысының Октябрь ауылында дүниеге келген. 1965 жылдан бастап Қарағанды қаласында тұрады. Қаланың ғылыми және білім беру әлеуетін қалыптастыруға, дамытуға, жоғары білікті кадрлар даярлауға, өскелең ұрпақты тәрбиелеуге қосқан зор үлесі мен қала өміріне белсенді қатысқаны үшін 2001 жылы «Қарағанды қаласының құрметті азаматы» атағына ие болды.
Конференцияға отандық және шетелдік ғалымдар мен ұстаздар, зиялы қауым өкілдері келіп, Зейнолла Молдахметовтің ғылымға сіңірген еңбектеріне шолу жасады. Сонымен қатар «Жасанды интеллект» тақырыбы конференцияға арқау болды.
Қасымхан ҒАЛЫМ,
«Egemen Qazaqstan»
Қарағанды облысы