Ең алғаш шымылдығын қазақтың классик жазушысы Б.Майлиннің «Жалбыр» пьесасымен ашқан Құрманбек Жандарбеков атындағы Жетісай драма театры 55-маусымын А.Володиннің «Махаббат бер!..» драмасымен бастады.
Аудан орталығында орналасқан театрдың көрермені көп. Ал жаңа маусымның ашылуына аудан басшылары, мәдениет саласының ардагерлері қатысып, ұжымға сәттілік тіледі. «Кезінде Жүсіпбек Аймауытов «... театр деген нәрсе ермек емес, көңіл көтеру де емес, ол – үлгі, ол – тәрбие, өнер орны» деген. Театр сахнасынан әрбіріміздің өмірімізде жиі кездесетін ізгілік пен махаббат, зұлымдық пен қиянат, бас пайдасын ғана ойлайтын «менмендік» секілді қасиеттердің арақашықтығын, олардың айырмасын көруге болады. Зұлымдықты сынай отырып, адамдарға ізгілік пен имандылық жолына баға да бере аламыз», дейді аудан әкімінің орынбасары Марат Айнабеков. Ал театр директоры Орал Камал 55 жылдық тарихы бар театрдың жетістіктері мен өткеніне тоқталып, қуыршақ театрын қолға алып жатқанын жеткізді. Сондай-ақ жыл соңына дейін бірнеше жаңа туынды сахналанбақ.
Театр ұжымы жаңа маусымда тағы бір тың дүниені көпшілікке ұсынды. А.Володиннің «Махаббат бер!..» драмасын сахналаған қоюшы-режиссер Аридаш Оспанбаева болса, режиссер ассистенті Елдос Ақылов, қоюшы суретшісі Бақыт Сраилов. Мемлекет іргесінің берік болуы үшін әрбір отбасының бекем болғаны маңызды екенін ұғындыруға ұмтылатын драмада соңғы кездері отбасы құрған жастардың да, ересектердің де арасында ажырасу фактілерінің жиілеп кеткені, шаңырақтың шайқалу себептері, өз бақыттары үшін соңына дейін күресе алмаудың салдары кеңінен суреттеледі. Ерлі-зайыптының сыйластығын, ізет-құрметін қалай сақтап, нығайтуға болады? Дос пен достың, әйелі мен күйеуінің алдындағы міндеттері неден тұрады деген сұрақтарға жауап іздейді. Өнер ұжымының жаңа туындысы көрермен көңілінен шықты. Өнерсүйер қауым әртістердің әрбірі өздеріне бекітілген образды керемет алып шыққанын, қойылымнан рухани нәр алып, белгілі бір мәселе бойынша ой түйгендерін айтады.
Түркістан облысы