Тәп-тәуір табыс көзі болып саналатын туризмнің бар саласын толайым дамыту өте маңызды. Әуесқой балық аулаушылар да тылсым табиғаттың аясында балық аулағанды хош көреді.
Талқара ауылындағы «SRG GROUP» серіктестігінің шаруасына қарап, бұл тараптағы жұмысты ілкімді ұйымдастыра білсе, ойға алған істің оңынан оңғарылатынына көз жеткізуге болады. Серіктестің болашағы зор. Бүгінде олар сұранысқа ие балық тұқымдарын өсірумен айналысады. Ақ айдында қазір тұқы, шортан, күмістұқы, ақ амур тәрізді балықтар жүзіп жүр. Алдағы уақытта форель өсіруге де мүмкіндік бар. Осыдан екі жыл бұрын серіктестік Краснобор су қоймасында бағалы балық өсіруге рұқсат алған. «Әрекет 2050» серіктестігімен тауарлы балық шаруашылығын дамыту бойынша биологиялық негіздеме әзірлеуге шарт жасасыпты. Оқу орындарымен ғылыми тұрғыда ақылдасып отыруға да келіскен. Даму жоспары бір ғана тармақтан тұрады. Бұл – жыл сайын тауарлы балық өсіру.
– Алдағы уақытта «Балық шаруашылығының ғылыми-өндірістік орталығы» серіктестігінің солтүстік филиалымен ғылыми зерттеу жұмыстарын жүргізуді және бағалы балық өндірісін дамыту барысында бірлесе жұмыс істеуді жоспарлап отырмыз, – дейді серіктестік директоры Марат Ыбыраев.
Бұл жерде тор ішінде балық өсіру технологиясы да қолданылады. Мұндай әдіс көршілес Ресейдің климаттық жағынан ұқсас келетін аймақтарында бар. Еліміздің Шығыс Қазақстан және Атырау облыстарында да қолданылады екен. Серіктестік бағалы балық өсіруге қажетті құрал-жабдықтар және азығын сатып алыпты. Торларды орналастыру, басқа да атқарылған жұмыстардың да ақысын төлеген. Ең бастысы, жаңадан 10 жұмыс орны ашылып отыр. Өткен жылы кәсіпорын ғылыми қызметкерлер үшін уақытша тұрақ базасын салып алған. Бұл мақсатқа 20 млн-ға жуық қаражат жұмсалған. Туризмнің осы бағытын тиімді ұйымдастыру үшін ұзындығы мен көлденеңі 45 метрлік балық бағылатын торлар орналастырылған.
Биыл су қоймасына 300 мың ақ амур, дәл осындай көлемде тұқы дернәсілдері жіберілген. Жуырда тағы да Ресейден 20 мың тұқы дернәсілі жеткізілмек. Серіктестік мамандары тәжірибесін жетілдіріп, білімін молайтуды межелеп отыр. Сол үшін де осы тақырыпта ұйымдастырылатын семинарларға үзбей қатысады.
Балық шаруашылығы кәсіпорнының жұмысы жолға қойылу үшін су айдынының орташа тереңдігі 3 метрден кем болмауы керек екен. Алдағы уақытта су қоймасының түбін шөккен лайдан тазалап, тереңдету жұмыстары күтіп тұр. 1958 жылы су қоймасы салынғаннан бері жыралардан құйылған көктемгі қызыл су лайды айдынның түбіне дейін жеткізіп, шөгіндіге айналған. 2016-2017 жылдардағы алапат су тасқыны кезінде Талқара ауылындағы су көзіне жақын салынған кейбір үйлерді су басып қалған. Сол кезде айналма ұра қазылған. Бұл әдіс су қоймасындағы су деңгейінің төмендеуіне әкеліп соққан. Енді бөгеттің биіктігін көтеріп, қысқы маусымда су деңгейін 3 метрден терең сақтау үшін жиектегі темір-бетонды қайта құру қажет. Осы шаруаны қолға алмас бұрын тиісті орган өкілдерінің қатысуымен мән-жайды егжей-тегжей сарапқа салған кеңес өткізіпті. Нәтижесінде, бюджеттен қажетті қаражат бөлу үшін техникалық паспорт әзірлеу қажет деген ұйғарымға келген.
Демалыс орнын ұйымдастыру да оңай-оспақ шаруа емес екен. Мәселен, қорықшылар осы жылы су қоймасының жағалауындағы орманды алқапты бірнеше мәрте өрттен құтқарыпты. Табиғат аясында тынығушыларға түсіндіру жұмыстары жүргізілген. Орман ішінде от жағу, көлікпен белгіленген мөлшерге дейін айдынға жақындамау керектігі ұғындырылған. Қорық қызметі су қоймасының жағалауын таза ұстауға тырысып, төңіректі қоқыстан тазартып жатыр. Талқара орман шаруашылығы мен бау-бақша өсіруге қажетті жерді жалға алу туралы шарт жасасыпты. 124 қарағай, 54 жеміс ағашы, 500-ден аса қарақат бұталары, басқа да дақылдар отырғызылған. Биылғы күзде тағы да 120 қарағай мен қылқан жапырақты ағаш көшетін отырғызу межеленіп отыр. Ден қойса, ауылда да табысты саланы дамытуға болады екен.
Ақмола облысы,
Ақкөл ауданы