Панамадан жеткен жеңіс

World Robot Olympiad – бүкіл әлем бойынша роботтехника мен STEM білім беру жүйесін дамытатын жаһандық олимпиада. Дүниежүзілік додаға Қазақстан командасы биыл бесінші рет қатысып отыр. Ел құрамасы WRO ел чемпионатының қорытындысы бо­йынша жасақталған. Елор­дадағы «Robotek» мектебінің оқу­шылары Әмір Қарабаев пен Аңсар Сауырбаев «Future Engineers» категориясы бойынша WRO-2023 күміс жүлдесін қан­жығаларына байлады. Сондай-ақ Вагиз Дисембаев пен Жан­арыс Қапаров ел қоржынын қоламен толықтырды. Қызылорда қала­сындағы Назарбаев зияткерлік мек­тебінің оқушылары Максим Усольцев пен Дінмұхамед Әбдиев «Robomission» категория­сы бо­йын­ша үшінші орын алды.

«Бұл менің осындай халық­аралық жарысқа екінші келуім. Осыған дейін Дортмундта болған сайысқа қатысқанмын. Шынымды айтсам, биыл өзімді еркін әрі сенімді ұстадым. Жарыстың бі­рінші күні-ақ жақсы нәтиже көрсеттім. Жалпы, роботтехникада ең бастысы логика мықты болуы керек», дейді  жеңімпаз Жанарыс Қапаров.

Панамада өткен жылдың бас­ты жарысында 81 ел бақ сынады. Қатысушыларды қолдауға өткен жылы Дортмундта WRO эс­тафетасын қабылдаған Па­на­маның бірінші ханымы Язмин Колон Картизо келді. Қазақстан жасаған стендте Язмин Колон Картизо біздің жігіттерге сәттілік тілеген де болатын. Дүниежүзілік ро­боттехника олимпиадасының ж­а­һандық күн тәртібі адам мен робот ынтымақтастығын та­быс­­ты және қауіпсіз ету мәсе­ле­сіне арналған. WRO-ның не­гізгі тақырыптары дәстүрлі түр­де БҰҰ-ның тұрақты даму мақ­саттарымен байланысты. 2023 жылға арналған тақырып әлем ел­деріне ортақ – «Connecting the World», «Әлемді байланыстырамыз». Командалар цифрлық индус­трия үшін инфрақұрылым мен логистиканы жасайтын роботтармен жұмыс істеді.

«Әлемнің түкпір-түкпірінен келген оқушылардың талабы биік, ынтасы жоғары. Ел мойындаған зерек балалар жарысқа бар күш-жігерін салып келді. Бір мақ­сат жолында, жеңіс үшін келген ба­лалардың талабы көңіл көншітеді», дейді Қазақстан құра­масының бапкері Мирас Мұратханов.

Үш күн бойы World Robot Olympiad әлемдік фина­лын­да отан­дық құлтемір құрастыру­шылар бірегей шығармашылық, инженерлік шешімдер мен же­ңіске деген сенімділігімен көз­ге түсті. Жалпы есеп­те Қазақстан құрамасы Ма­лайзия құрамасына ғана есе жіберіп, екінші орынға көтерілді. Айта кетейік, Қазақстан туының бай­рақты бәсекеде үш рет жел­біреуі цифрландыру және ақпа­раттық технологиялар күніне сәй­кес келген болатын.

Панамада өткен Бүкіләлемдік роботтехника олимпиадасы ая­сында елордалық «Robotek» ком­­паниясы Америка Құрама Штат­тары, Қытай мен Әзербай­жан­ның танымал роботтехника мектептері, клубтары­мен ынтымақтастық туралы ме­мо­рандумдарға қол қойды. «Ал­дағы уақытта Қазақстанмен бір­лесіп жұмыс істеуге ниеттіміз. Себебі қазақ оқушылары өте та­лантты. Бүгінгі жарыста бізді тән­ті етті», деді ұйымдастырушы Уйльям Уонг.

World Robot Olympiad бас хат­шысы Клаус Кристенсен «Ro­botek» мектебінің елдегі WRO, STEM білім беру және робот­техниканың жаһандық миссиясын ілгерілету бойынша ауқымды жобаларын жоғары бағалады. Клаус Кристенсен информатика мұ­ғалімдері мен мектеп оқушы­ларын оқытуға және робот­тех­никаға қызығушылықты арт­тыруға арналған танымал «Ozyq Urpaq» жобасын ерекше атап өтті.

Роботтехника – зияткерлік автоматтандырылған техникалық жүйелерді әзірлейтін, оны өн­діріске енгізетін қолданбалы ғылым. Бұл ғылымды дамыту елді цифрландыруды жеделдетеді.