«Мен жанбасам лапылдап, Сен жанбасаң лапылдап, Біз жанбасақ лапылдап, Аспан қалай ашылмақ?» демекші, аға буынға қарап ауыз ашып, алақан жайып отырмай, жастардың тізгінді өз қолдарына алғаны көңіл қуантады.
Ұлытау облысының орталығы Жезқазған қаласында тұратын бір топ жас ақын өзара бас қосып, облыстық әдеби клуб ұйымдастырды. Клубқа «Ұлар» атауы берілді.
Құрамына Жанат Әбдіғожин, Медет Қарахметов, Абай Ораз, Мұқағали Сейтқазы, Қанат Мусин, Мәди Олжабай және Жоламан Мағзұм тәрізді жас таланттар топтасқан әдеби клуб «Жайлауы жас қаламның – албырт сезім» тақырыбымен облыс аудан, қалаларын аралап, поэзия кештерін өткізе бастады.
«Біз қазірдің өзінде Жаңаарқа ауданының орталығы Атасу кентінде, Қаражал қаласында, Ұлытау ауданында жырсүйер қауыммен жүздестік. Мақсат – көпшіліктің өлеңге, жалпы әдебиетке деген қызығушылығын ояту. Сонымен бірге ел арасында жүрген талантты жастарды іздестіру. Алдағы уақытта облыс орталығында үлкен поэзия кешін ұйымдастыру ойымызда бар. Бұл кешке ауылдардағы, аудан, қалалардағы қатарымызға қосылған жастар да қатысатын болады», дейді клуб төрағасы Абай Ораз.
Ұлытау облысы