Ауыл оқушылары олимпиадасы

Оқу-ағарту министр­лі­гі­нің бастамасымен өткен олимпиада алғаш рет ұйымдастырылып отыр. Мақсат – ауыл мен қала мектептерінің арасындағы алшақ­тықты азайту әрі оқушы­лар­дың зейінін арттыру. Ми­нистр Ғани Бейсембаев пән­дік олимпиадалардың оқу­шы­лар үшін маңызын былайша түсіндірді: «Пәндік олимпиада – бала­лар­дың санасында алғашқы ғылыми ізденістерге жол салатын, болашақ ғалымдарды шабыттандыратын, ғылыммен еркін айналысатын жастар тобын қалыптастыратын ең ауқымды бағдарламалық са­йыс. Мектеп оқушыларының бе­делді олимпиадаларға қаты­су рейтингі жеңіс қоржы­нын­да медальдар санының кө­­бе­йгенін, білім сапасының артқанын көрсетеді».

«Дарын» республикалық ғылыми-практикалық орта­лы­ғының директоры Ғаждембек Тұрсыновтың айтуын­ша, олим­пиадаға ауыл мек­теп­­те­рінің 9-11 сынып оқу­шы­ла­ры қатысып жатыр. Осы­­лайша, еліміздің шалғай елді мекендеріндегі дарынды және талантты балалардың қабі­лет­терін анықтап, дамыту, ха­лықаралық олимпиадаларға қатысуға ынталандыру көзде­ліп отыр. «Республикалық олим­пиадаларда академиялық адалдықты қамтамасыз ету үшін тапсырмалар әр қатысушыға электронды түрде жеке-жеке жіберіледі. Олимпиаданың барлық кезеңінде оқушы­лар­дың аты-жөні көрінбейді. Әр кезеңнен кейін тапсыр­ма­лар­дың сканерленген нұс­қасы, қатысушылардың жұмыс­та­ры мен дұрыс жауаптар орта­лық­тың сайтында жарияланады», деді Ғ.Тұрсынов.

Іріктеу кезеңі өткен жылдың қараша айында басталған. Олим­пиада жаратылыстану-ма­тематикалық және қо­ғамдық-гуманитарлық бағыт­тар­ды қамтитын 13 пән бойынша өткізіледі. Бастапқы кезеңге қатысу үшін оқушылар аuyl.daryn.kz сайтында тіркелуден өтті. Нәтижесінде, 90 мыңнан астам оқушы қатысуға ниет білдірген. ІІ іріктеу кезеңі желтоқсан айында өткізіліп, тапсырмалар онлайн-платформада берілді. Ал қорытынды кезең Астанада өтіп жатыр. Оған екінші кезеңнен өткен 1088 оқушы қатысып жатыр. Қоғамдық-гуманитарлық бағыттағы пәндер бойынша олимпиада 21-25 қаңтар ара­лы­ғына жоспарланған. Ал 5 күнге созылған жаратылыстану-математика бағытындағы сайыс өз мәресіне жетіп те үлгерді.

Жүлделі орындарға ие бол­ған оқушылардың толқы­ны­сы мен қуанышын көргенде олимпиаданың ауылдағы оқу­шыларға үлкен мүмкіндік сый­­лағанын байқадық. Батыс Қа­­зақстан облысы Теректі ауданы Шағатай ауылының 11-сынып оқушысы Дәурен Темірболат республикалық ке­зеңге жолдама аламын деп ойламағанын айтты.

– Екі кезеңнен өтіп, Астана қаласына келдім. Респуб­ли­ка­лық сында география пәні бо­йынша 3-орын иегері атандым. Бұл мен үшін үлкен қуаныш, үлкен дәреже. Біздің ауылдан республикалық дең­гейде нәтиже көрсеткен ал­ғашқы оқушы болып отырмын. Де­ген­мен таңдау пәнім география болғандықтан қо­рытынды кезеңнің тапсырмалары ма­ған қатты қиын болмады. Жақсы дайындықпен келдім. Тек шамалы қобалжу болды. Олимпиада өте жоғары деңгейде ұйымдастырылған. Мұндай іс-шаралар жиі ұйым­дастырылып тұрса дейміз. Өйткені бұл біз үшін өте жақсы мүмкіндік. Осы сайыстың нәтижесінде жаңа достар таптым, керемет көңіл күй сыйлап жатыр, танымымыз кеңейді. Бұл жарыста орын алмасам да еш өкінбейтін едім. Қатысудың өзі үлкен абырой, – дейді Дәурен.

Ал математика пәні бо­йынша 2-орынға ие болған Жамбыл облысы Т.Рысқұлов атындағы мектеп-лицейінің 11-сынып оқушысы Жанкелді Байкейдің айтуынша, нағыз білімді, дайындығы мықты оқушы міндетті түрде жүлделі орындардан көрінеді.

– 90 мың адамның арасынан іріктелініп, олимпиадаға қатысуға мүмкіндік алдым. Сол кезден бастап алдыма мақсат қойып, төрт ай бойы дайындалдым. Енді, міне, нәтижесін көріп отырмын. Алайда бұл жарысқа әуелі моральдық тұр­ғыда дайындалуым керек деп ойладым. Себебі мұнда жеңіс те, жеңіліс те болады. Оған тұрақты дайындық керек. Меніңше, бұл олимпиаданың үлкен артықшылығы – ауыл мен қала мектептеріндегі ал­шақтықты жоюға мүмкіндік беруінде. Сондай-ақ ауыл оқушыларының өзіне деген сенімділігін арттырып, талантты жастардың көп екенін дәлелдей түсті. Мен Президент Қасым-Жомарт Тоқаевтың «еліміз ІТ мемлекетке айналуы керек» деген ұстанымын толық құптаймын. Соның негізінде ІТ саласындағы мықты маман болғым келеді, – деді жүлдегер оқушы.

Марапаттау салтанатын­да Оқу-ағарту бірінші вице-министрі Наталья Жұма­діл­дае­ва жүлдегерлер ара­сында елі­міз­дің абы­ройын әлемдік деңгейде көте­ре­тін болашақ мықты ға­­лымдардың барына сенім біл­­дірді. «Мен сахнаға көте­ріл­ген оқушылармен бірге қобалжып, бірге қуанып отырдым. Сіздердің өмірлеріңізде осындай жарқын жетістіктер көбейе берсін. Тек ақыл мен еңбекке сенім арттыңыздар», деді ол оқушыларға.

Ұйымдастырушылардың ай­туынша, олимпиаданың үшінші кезеңінің әрбір қа­ты­сушысы жеке жұмыс орнымен, жауап парақтарының блан­кілерімен, оның оқу тілін­дегі тапсырмалар мәті­ні­мен толық қамтамасыз етілді. Ашық­тық пен академия­лық адал­дық­ты сақтау мақса­тында олим­пиа­даның өту барысы онлайн режімде көруге арналған бейне­бақылау жүйесі­мен қада­ғаланды.

Айта кетейік, жаратылыс­тану-математика бағыты бо­йынша олимпиаданың же­ңімпаздарын марапаттау салтанатында Жамбыл, Түр­кістан, Абай, Атырау облыстарынан келген оқушылардың аты жиі аталды. Жамбыл облысы Т.Рысқұлов ауданы Т.Рысқұлов атындағы мектеп оқушыларының жетекшісі Динара Ниязқұлова ауыл мек­теп­теріндегі дарынды бала­ларға көңіл бөлініп жатқаны қуантарлық жайт екенін атап өтті.

– Жамбыл облысынан рес­публикалық кезеңге 28 оқу­шыны алып келдік. Білім алушылардың біршамасы жүлделі орындарға ие болып, тамаша нәтиже көрсетті. Өте қуаныштымыз. Балаларды даярлаған мұғалімдеріне ал­ғыс білдіреміз. Әрі олимпиаданы ұйымдастырушыларға ауыл мен қала арасындағы алшақтықты жою мақсатында осындай бастама көтергені үшін ризашылығымыз шексіз, – деді Динара Ниязқұлова.

Жаратылыстану-математи­­ка бағытындағы олимпиа­­­да қорытындысы бойынша же­ңімпаздар мен жүл­де­­гер­­лер анықталып, Оқу-ағар­ту ми­нистр­лігінің дипломдары­мен марапатталды. Сон­дай-ақ жеңімпаздарға елі­міз­­дің бірқатар жоғары оқу орын­да­рының ректорлық грант­­та­ры табысталады. Ал қо­ғам­дық-гуманитарлық ба­ғыт­тағы пәндер бойынша олимпиада нәти­жесі 25 қаңтарда белгілі болады.

Айта кетейік, III кезеңнің бар­лық қатысушысы «Дарын» республикалық сырттай мек­тебіне қабылданады. Сонымен қатар I дәрежелі диплом ие­герлері 2024 жылғы жалпы білім беретін пәндер бойынша республикалық олимпиаданың қорытынды кезеңіне қатысуға мүмкіндік алады.