Наурызнаманың Жаңару күнінде облыс орталығы Тараз қаласы мен өңірдің бірқатар ауданында «Жасыл желек – жердің көркі» акциясы ұйымдастырылып, көшеттер отырғызылды.
Тараз қаласындағы Қайрат Рысқұлбеков атындағы орталық саябаққа өңір басшысы Ербол Қарашөкеев, қала әкімі Бақытжан Орынбеков бастап, зиялы қауым өкілдері қоштап, 605 түп көшет отырғызды. Тараз қаласының әкімі Б.Орынбековтің айтуынша, облыс орталығын көгалдандыру жұмыстары үздіксіз жүргізіле бермек.
Дерекке сүйенсек, осы жылы Тараз қаласында 1 млн-нан аса гүл, оның ішінде 15 мың дана раушан гүлін егу жоспарланған. «Жасыл белдеу» бағдарламасы аясында 20 мың, «Ұлы дала» шағын ауданында салынатын саябақта 3 500, жалпы алғанда 40 мың түп тал-дарақ егіледі екен.
«Мемлекет басшысының тапсырмасына сәйкес, өңірдегі орман қорын молықтыру және молайту жөніндегі кешенді жоспар аясында 16 540 гектар аумаққа 34,5 млн түп тал-дарақ отырғызу жоспарланған. Бұл жұмыс сәтімен жүзеге асырылады.
Бұған қоса елді мекендерді көгалдандыру, жасыл аймақ құру мәселесі де назардан тыс қалмақ емес. Мәселен, өңірдегі ауылдарда 170,3 гектар аумаққа 200 мың түрлі ағаш көшеті отырғызылады», дейді өңір басшысы Е.Қарашөкеев.
ТАРАЗ