Кейінгі уақытта белгілі баспалардан көркем әдеби, танымдық, психологиялық, ғылыми жинақтар жаңбырдан кейінгі саңырауқұлақтай қаулап шыға бастады. Әсіресе балаларға арналған кітаптардың жөні бөлек. Аударма ісінің жолға қойылуы, тұлғатану өрісінің дамуы ұлт оқырмандарына жаңаша көзқарас сыйлап отыр.
Алматы қаласы, Coffee Book кофеханасында «Мазмұндама» баспасының бастамасымен Ұларбек Дәлейұлының «Жошы хан кім?», Сәуле Досжанның «Жақсылық Үшкемпіров кім?» және Асылан Тілегеннің «Мәншүк Мәметова кім?» кітаптарының таныстырылымы болып өтті.
Іс-шараны игі тілегімен баспа директоры Шыңғыс Мұқан өзі ашты. Әдеби танымдық кешке «Дәстүрге жол» қоғамдық ұйымының ақ әжелері бастаған, жастар мен балалар қостаған қалың оқырман қатысты.
Кездесу кешінде жиналған оқырман кітап авторларымен тілдесіп, өз қолынан қолтаңба алу мүмкіндігіне ие болды. Ұларбек Дәлейұлының «Жошы хан кім?» кітабында Шыңғыс қағанның тұңғыш ұлы Жошы ханның батырлыққа толы өмір жолы суреттелген. Жиырма бес жасында Тоғайлы жұртын бағындырып, көзге түскен Жошы бала күнінен-ақ шешімтал зеректігімен көзге түседі. Көп өтпей-ақ Шыңғыс қағанның бұйрығымен Дешті-Қыпшақ ұлысын басқарып, ордасын Ұлытауда тігеді. Кітапта Жошы хан билеген замандағы тарихи оқиғалар, қазіргі қазақ елінің алғашқы қалыптасу кезеңі суреттеледі. Жошы хан ұлтымыз үшін қастерлі һәм маңызды тұлға екені жинақ арқылы қалың оқырманның жүрегіне жетеді. Баба мұратын арқалаған бүгінгі жас өскін тарихын терең білсе ғана аманат жүгін тереңірек сезінері ақиқат.
Сәуле Досжанның «Жақсылық Үшкемпіров кім?» кітабында ұлттық намыстың үлгісіне айналған қазақ балуаны Жақсылық Үшкемпіровтің өмір жолы, қызметі, өмірінің шешуші сәттері көрініс тапқан. Қазақстанда күрес спортының дамуына зор үлес қосқан атақты спортшының жарқын оқиғаларға толы өмір жолы жастарға үлгі екені даусыз. Спортшы тек бозкілемде ғана емес, өмірде де өз ұстанымдарынан таймай, адамшылықтың ақ туын көтеріп, еліне ерен еңбек сіңірді. Жинақта Жақсылық Үшкемпіров өмірінің шешуші кезеңдері баяндалып, оқырманның жеңіске ұмтылуына шабыт сыйлайды.
Асылан Тілегеннің «Мәншүк Мәметова кім?» кітабында қазақтың батыр қызы Мәншүк Мәметованың балалық шағына шолу жасалып, жас күніндегі өжет болмысы мен қан-қасап майдан даласындағы ерліктері баян етіледі. Кітаптың маңызы сол, жинақ әр қазақ баласының бойдағы жауапкершілікті сезіну, отанды сүю сынды абзал қасиеттерін оятып, ізгіліксүйгіштікке, ержүректілікке баулиды. Кітаптағы кестелі өрілген оқиғалар Мәншүк Мәметованың замандастары, көзкөргендері, ағайын-туыстарының естелігі бойынша шындыққа негізделіп жазылған.
«Мазмұндама» баспасының «Тұлғатану» сериясымен осы уақытқа дейін адамзат ақыл-ойына қызмет еткен белгілі тұлғалар мен отанымыздың сүбелі қайраткерлері туралы көптеген кітап жарыққа шыққан болатын. Атап айтар болсақ, «Ахмет Байтұрсынұлы кім?», «Никола Тесла кім?», «Дина Нұрпейісова кім?», «Дінмұхамед Қонаев кім?» «Санжар Асфендияров кім?» сынды жинақтар оқырман ықыласына бөленіп үлгерді. Бұл кітаптардың басты ерекшелігі – елімізге белгілі тұлғалардың өмірі мен шығармашылығын мектеп мұғалімдері мен оқушылардың тіліне лайықтап, жеңіл де бейнелі тілмен әсерлі жеткізуі. Елеулі бастама алда жүйелі жалғасын тауып, оқырманға өзге де табысты дүниелер сыйлайтынына сеніміміз мол.