Дәстүрге айналған «Мерейлі отбасы» ұлттық байқауының өңірлік кезеңі мәресіне жетті. Облыстық байқауға өңірдің барлық ауданынан үлгілі отбасылар қатысып, өнерін ортаға салып, республикалық кезеңнің жолдамасын жеңіп алуға тырысты.
Іс-шараға өңір басшысы Ербол Қарашөкеев арнайы қатысып, жүлделі орындардан көрінген мерейлі шаңырақ иелерін марапаттады. Сондай-ақ ол ұлттық байқаудың тағылымы мен маңызы туралы айтып, жеңімпаз отбасыға сәттілік тіледі.
«Өнегелі отбасы – кез келген мемлекеттің тірегі, ұрпақ тәрбиесінің бастау бұлағы. Отанға деген кіршіксіз махаббат пен қылаусыз құрмет үлгілі отбасыдан басталатыны ақиқат. Дәстүрге айналған ұлттық байқау еңбегімен еленген, дәстүрге деген адалдығымен дараланған шаңырақтардың мерекесіне айналғаны анық. Сан салада табысқа жеткен отбасылар осы байқауда бақ сынайды. Олардың жарасымға толы сыйластығы мен шынайы отбасылық қарым-қатынасы баршамызға үлгі», деді облыс басшысы марапаттау рәсімінде.
Он жыл бойы үздіксіз ұйымдастырылып келе жатқан байқаудың өңірлік кезеңдерінде күні бүгінге дейін 2 мыңнан аса отбасы бақ сынапты. Ал осы жылы Тараз қаласы мен аудандық деңгейде топқа түскен 218 отбасының 22-сі облыстық кезеңге жолдама алған.
Байқау қорытындысы бойынша бас жүлде Таңатаровтар отбасына бұйырды. Бұл әулеттің үш буыны, яғни әкесі, балалары мен немерелері – спортты жанына серік еткен оғландар.
Шаңырақтың үлкені Достық Таңатаров үш ұлын спортқа баулып өсірген. Ол – еркін күрестен спорт шебері, аға жаттықтырушы. Ұлы әйгілі еркін күрес шебері Ақжүрек Таңатаров Қазақстанның еңбек сіңірген спорт шебері, Лондон қаласында өткен Жазғы Олимпия ойындарының қола жүлдегері болса, Ақниет Таңатаров бокстан республикалық жарыстардың жеңімпазы атанған. Үшінші ұлы Едіге Таңатаров та спортпен айналысады, бүгінде «Бірлес» көкпар клубының капитаны.
Ата жолын немерелері де жарысымды жалғастырып жүр. Есугей мен Әділ еркін күресті жанына серік етсе, Айзере көркем гимнастикамен тұрақты түрде шұғылданады.
Байқауда бақ сынаған меркілік Ешетовтер отбасы бірінші орынға лайық деп танылса, екінші орынға шулық Баймағанбетовтер, құландық Өмірбаевтар отбасы ие болды. Жамбылдық Абсатаровтар мен сарысулық Шынбатыровтар әулеті үшінші орынды қанағат тұтты.
Байқау жеңімпаздарына диплом және қаржылай сертификаттар табысталды.
Тараз