Жаңа оқу жылы қарсаңында Өскеменде көпшілік көптен күткен №50 орта мектептің есігі оқушыларға айқара ашылды. Көпшілік күткен дейтініміз, «Нұрлы жол» шағын ауданындағы 600 орындық бұл мектеп аралас болып кетуі әбден мүмкін еді. Әйтеуір, құзырлы органдар көпшіліктің сұрауына қарай таза қазақ орта мектебі болады деп шешкен.
600 орындық жаңа мектеп екі ауысымда 1200 оқушыға білім беруге әлеуетті. Үш қабатты білім ордасының лентасы қиылған соң оқушылар мен ата-аналар, арнайы шақырылған қонақтар спорт залға өтіп, салтанатты жиынға қатысты. Әнұран шырқалды, бата берілді, көпшіліктің ақ тілегі ақтарылды.
– Қаламызда жаңа шағын аудандар салынып, инфрақұрылым заманға сай жасалып жатыр. Міне, жаңа мектеп ашылды. Мемлекет тарапынан оқушылардың білім алуына жалпы жағдай жасалды. Жыл соңына дейін Зайсан ауданы мен Жаңа Бұқтырма кентінде тағы екі мектеп ашылады. Сондай-ақ жеті бірдей «Жайлы мектеп» құрылысы қарқын алады. Мұның бәрі ел ертеңі үшін істеліп жатыр, – деді облыс әкімінің орынбасары Ербол Нұрғалиев.
Ресми жиыннан кейін жаңа мектепке құтты болсын айтып келген қонақтар білім ошағын аралап, заманауи жабдықталған кабинеттерді көрді. Бірінші қабаттың өзінде инклюзивті білім беруге арналған кабинет, үш шеберхана, радио орталық, сенсорлық бөлме, спорт зал, сондай-ақ бес бірдей оқу кабинеті орналасқан. Мектептің әкімшілік қызметкерлері де бірінші қабатта отырады. Ал екінші қабатта мұрағат, кітапхана, роботтехника кабинеті, зертханасы және 16 оқу кабинеті бар. Мұғалімдер бөлмесі мен акт залы да осы қабатта. Зертханалық жұмыстарға арналған үш кабинет үшінші қабаттан қарастырылған. Барлығы 32 оқу кабинеті, 4 зертхана, 3 шеберхана бар. Мұнда 8 – бастауыш сынып, 10 – орта буын, 4 – жоғары буын және екеуі мектепалды даярлық сыныбында білім алады. Айта кетейік, барлық кабинет жиһазбен, 28 панельді тақтамен және көпфункционалды принтермен жабдықталған. Баласы заман талабына сай мектепте білім алатын қай ата-ана болсын, шын қуанышты шығар.
– Шынымды айтайын, алғашында бұл мектеп аралас болып кетер ме екен деген үрей болды. Қазақ көп шоғырланған ауданға аралас мектептің қажеті қанша деп арыз-арманымызды журналистерге сан мәрте айттық. Мәселе көтерілді. Басшылыққа жетті. Арманымыз орындалып, бала-шағамыз жаңа, жайлы мектептің табалдырығын аттады. Мемлекет оларға білім алуға бүгін жағдай жасаса, ертең олар мемлекеттің дамуына жағдай жасайды. Еліміз аман болсын, – дейді бірінші сыныптың ата-анасы Айгүл Амангелдіқызы.
Жалпы, 2024-2025 оқу жылында 9824 бала бірінші сыныпқа барды. Алдағы уақытта Зайсан қаласында 300 орындық, Жаңа Бұқтырма кентінде 200 орындық білім мекемесі ашылады. Ал «Жайлы мектеп» жобасымен жеті мектептің құрылысы жүріп жатыр. Атап айтсақ, Өскеменде 1500 орындық үш мектеп, Риддерде 600 орындық бір мектеп, Шемонаиха ауданында 300 орындық бір және Глубокое ауданында 600 орындық екі мектеп ашылады.
Айтқандай, Президент тапсырмасына орай Шығыста бастауыш сынып оқушылары тегін тамақтанады. Әлеуметтік жағынан аз қамтылған отбасылардың оқушылары да мектепте тегін тамақпен қамтамасыз етілген. Жалпы, аймақта 4,6 мың баланы мектепке күнделікті тасымалдауға 126 автобус қызмет көрсетеді.
Шығыс Қазақстан облысы