Облыс орталығы Тараз қаласын көгалдандыру, абаттандыру жұмысымен айналысатын «Жасыл ел – Тараз» кәсіпорнының техникалық базасын арттыруға жергілікті атқарушы билік айрықша назар аударып отыр. Кейінгі жылдары серіктестіктің техникалық базасы түрлі көлікпен толықты. Кәсіпорын жұмысының өнімділігін арттыру мақсатында күні кеше қала әкімдігі ұжымға тағы бірнеше жүк көлігінің кілтін табыстады.
«Жасыл ел – Тараз» кәсіпорнында тәжірибесі толысқан мамандар жұмыс атқарып жатыр. Олар қала тазалығына жанашырлықпен қарайды. Жұмысшылардың жүзінен өз ісіне деген адалдық байқалып тұрады. Облыс орталығын абаттандыру, көгалдандыру, санитарлық тазалық жұмысын талапқа сай атқарып жүрген ұжымның еңбегі еселі екенін ерекше атап өткен жөн. Нақтырақ айтар болсақ, мекеме тарапынан шаһардағы тұрмыстық қатты қалдықтарды шығару, саябақтар мен скверлерді, гүл бақтарын, жаяу жүргінші жолдарын күтіп ұстау, қыс мезгілінде қар тазалау, мұз қатпау үшін жолдарға құм, тұз себу, тал егу жұмысы жүйелі түрде атқарылып жатыр. Сондықтан кейінгі бірер жылдың бедерінде серіктестікті жаңа техникалармен қамтамасыз ету қолға алынды», дейді Тараз қаласының әкімі Бақытжан Орынбеков.
Шаһар басшысының айтуынша, Тараз қаласының тазалығы жергілікті атқарушы биліктің назарынан тыс қалмайды. Сол тұрғыда «Жасыл ел – Тараз» кәсіпорнының техникалық базасын толықтыру жұмыстары алдағы уақытта да жалғасын табады.
Тараз қаласының әкімі Б.Орынбеков бұл күні ұжымға су жаңа тоғыз жүк көлігінің кілтін тапсырды. Қалалық әкімдіктің баспасөз қызметі келтірген дерекке жүгінсек, табысталған техниканың жетеуі қоқыс шығаруға арналған «Камаз-65115» маркалы көлік болса, екеуі қыс мезгілінде жол шетіндегі қарды тазалауға арналған «Амкодор-37» маркалы техника екен. Осылайша, кәсіпорындағы техника тапшылығы жыл өткен сайын азайды.
Деректерге жүгінсек, «Жасыл ел – Тараз» кәсіпорнына өткен жылы 8 техника беріліпті. Екі жылды қоса есептесек, серіктестіктің техникалық базасы 17 көлікпен толыққанын байқаймыз. Әрине, қала тазалығына жауапты ұжымға бұл – үлкен қамқорлық.
«Облыс орталығын көгалдандыру, абаттандыру жұмыстары оңай шаруа емес. Ілгеріде техниканың жоқтығынан жұмыс баяулап қалған кез де болды. Алайда кейінгі жылдары жергілікті атқарушы биліктің қамқорлығымен жаңа техникалар алынып жатыр. Бұл серіктестіктің жұмысына соны серпін береді. Әлбетте, осы орайда басшыларға айтар алғысымыз шексіз», дейді кәсіпорын қызметкерлері.
Кейінгі 2-3 жылдың бедерінде «Жасыл ел – Тараз» кәсіпорнының жұмысы жандана түсті. Қала тазалығына жауап беретін ұжымға жергілікті атқарушы билік тарапынан айтарлықтай қолдау көрсетіліп жатқаны көңіл қуантады.
Тараз қаласы