Мәжілістің Әлеуметтік-мәдени даму комитетінде оқу бағдарламаларының мазмұнын жаңарту жөнінде тақырыптық отырыс өтті. Жиында қазіргі оқу бағдарламасына қатысты бірқатар ұсыныс пен цифрлық технологияны кеңінен пайдалану сынды мәселелер көтерілді.
Комитет төрағасы Асхат Аймағамбетов жетекшілік еткен отырысқа депутаттармен қатар білім саласы мамандары, сарапшылар, мемлекеттік орган өкілдері қатысты. Басқосуда Оқу-ағарту министрлігі Орта білім беру комитетінің төрағасы Қаныбек Жұмашев әр 5-7 жыл сайын оқу бағдарламаларын қайта қарау керектігін, бұл білім беру жүйесінің қоғамның уақыты мен қажеттілігіне дер кезінде жауап беруіне ықпал ететінін атап өтті.
– Жаңа мемлекеттік стандарттарды енгізу білім беру саясатындағы жаһандық трендтерді көрсетеді. Яғни сыни ойлау, аналитикалық дағдылар және проблемаларды шешуге инновациялық көзқарас секілді құзыреттерді дамытуға бағытталған. Оқу бағдарламаларын қайта қарауда отандық және халықаралық үрдістер ескеріледі. Бұл оқушылардың академиялық білімін ғана емес, функционалдық сауатын, ақпараттық-коммуникациялық технологияларды жоғары деңгейде меңгеруін қалыптастыруға арналған. Білім стандарттары шеңберінде оқу үдерісіне цифрлық технологияларды енгізуге ерекше көңіл бөлініп келеді. Әр оқушы бастауыш білім беру кезеңінде меңгеруі керек білімге, білікке және дағдыларға қойылатын талапқа сай қамтылған. Бұған тіл және әдебиет, математика, информатика, жаратылыстану, технология және өнер, денешынықтыру сияқты негізгі оқу пәндері бойынша пәндік құзыреттілікті дамыту кіреді. Бұл тәсіл оқушылардың академиялық және өмірлік дағдыларын жүйелі қалыптастыруға мүмкіндік береді, – деді Қ.Жұмашев.
Мәжілістің Әлеуметтік-мәдени даму комитетінің мүшесі Жұлдыз Сүлейменова Оқу-ағарту министрлігі Ы.Алтынсарин атындағы ұлттық білім академиясымен бірлесіп оқу бағдарламаларының жаңа стандартын жасауға кіріскенімен әлі нәтиже байқалмай отырғанына тоқталды.
– 2015 жылы жаңа стандарт енгізіліп, 2016 жылы мектептеріміз сол негізде оқи бастады. Меніңше, білім сапасының күрт төмендеп кетуі құндылықтарымыздың білім саласында біртұтас ұйыспауынан болып отыр. Сонымен қатар қазіргі таңда ауыл мектептері мен қала мектептерінің білім сапасындағы айырмашылық тереңдеп бара жатыр. Бізде 500-ден аса инновациялық мектеп бар, бұл – зияткерлік мектептер, білім инновация лицейлері, Binom мектептері. Онда балалар өте жақсы білім алады. Бірақ көпшілігі оқуға шетелге кетеді. Қазақстанға келіп, еңбек нарығына жұмыс істейтін – ауыл мектебінің балалары. Ал жай мектептер мен осы инновациялық мектептердің білім бағдарламаларын салыстыратын болсақ, өте үлкен алшақтық бар, – деді Ж.Сүлейменова.
Отырысқа қатысушылар жаңа білім стандартын жетілдіруге қатысты сауалдарын ортаға салып, тәрбие жұмыстарын ұйымдастыру, бастауыш мектеп оқушыларына орыс тілі пәнінің бағдарламасын жеңілдету, қазақ тілі грамматикасын біріздендіру, кітаптардың көлемін бір стандартқа келтіру, балалардың жасына лайық тапсырмалар беру, оқушылардың логикалық, цифрлық дағдыларын жетілдіру және басқа да мәселелерді жан-жақты талқылады.