Жезқазған қаласындағы «Қарлығаш» соматика санаторийі жанынан нейроортопедиялық кемшіліктері бар, 3 пен 18 жас аралығындағы балаларға арналған «QH» мемлекеттік оңалту орталығы ашылды. Ізгі іс-шара «Қазақстан халқына» қорының қамқорлығы арқасында мүмкін болды. Өйткені орталықты арнайы құрал-жабдықтармен жарақтандыруды осы қор өз міндетіне алып отыр.
Ұлытау облысы әкімдігінің қолдауымен жөндеу жұмыстары жүргізілген ғимаратта емделушілерге барлық жағдай жасалған. Жаңа орталықта жылына 600 баланың ем қабылдау мүмкіндігі бар. Мұнда мамандар әлеуметтік медициналық сақтандыру жүйесі аясында тегін қызмет көрсетеді.
– Орталықта жоғары деңгейдегі дәрігер-неврологтер, реабилитологтер, логопедтер, емдік денешынықтыру нұсқаушылары, дефектологтер, еңбек терапевттері, психологтер жұмыс істейді. Мамандарды оқыту бірнеше кезеңде, соның ішінде шетелдік тәлімгерлерді тарта отырып жүргізіледі, – дейді Ұлытау облысы денсаулық сақтау басқармасы баспасөз қызметінің жетекшісі Гауһар Сағындықова.
Орталықтың ашылу салтанатына Ұлытау облысының әкімі Д.Рыспеков, «Қазақстан халқына» қоғамдық қорының басқарма төрағасы Б.Жәмішев, басқа да жауапты тұлғалар қатысты.
Жезқазған