Былтыр еліміз аумағында іске қосылған шағын жинақты ауыл мектептерін дамытуға арналған бірегей жоба Ақтөбе облысынан бастау алған еді. Өйткені еліміз бойынша шағын мектептер саны жағынан Ақтөбе облысы көш бастап тұр.
Өңірдегі 134 ауыл мектебінің басындағы жағдай ұқсас: оқушы саны аз, пән мұғалімдері жетіспейді, оқу-материалдық база ескірген, Интернет байланысы әлсіз. Қала мен ауыл мектептері арасындағы білім деңгейінің айырмашылығын жою мақсатында Оқу-ағарту министрлігі «Білім беру саласын тұрақты дамыту қоры» мен «Қазақстан халқына» қорының қаржылай қолдауымен бірнеше бағытта жұмыс бастады.
Ең алдымен ауыл мұғалімдерін оқытуды Ақтөбедегі Назарбаев зияткерлік мектебі қолға алды. Шағын жинақты мектептердің бірегей үлгісі ретінде Алға ауданының Бестамақ орта мектебі таңдалып алынды. Осы білім беру ұйымына толық жөндеу жүргізіліп, пәндік кабинеттер жаңартылды. Одан өзге роботтехника кабинеті, телестудия, ағаш және металл өндеу кабинеттері, тігін шеберханасы мен ағаш өңдейтін ұстахана, АРТ-студия жасақталды. Мұғалімдер Ақтөбедегі NIS-де семинарларға қатысып, онлайн дәріс алды.
Бестамақ орта мектебінің директоры Әсел Дәулеталинаның айтуынша, бірнеше тегін үйірме балалардың қызығушылығын оятты. Соның нәтижесінде, Бестамақ мектебінің оқушылары роботтехникадан өткен сайыстарда жүлделі орынға қол жеткізді. Бір жыл ішінде осы білім мекемесінде оқушылардың сабақ үлгерімі 6%-ға өсіп, былтырғы түлектер түгел оқуға түскен.
Бестамақ мектебінің тоғыз мұғалімі Алға ауданындағы Бесқоспа, Талдысай және А.Байтұрсынов атындағы шағын жинақты мектептерде негізгі пәндер бойынша онлайн-сабақтар мен семинарлар өткізіп жүр. Бұл жобаға қатысушы тірек және магниттік мектептер арасында интернет байланысы қажет болғандықтан, «KazSat» спутник жүйесі ақылы интернет жүргізілді. «Осы жоба білім беру орындарының жағдайын жақсартып қана қоймай, оқушылардың білімге деген қызығушылығын арттырды. Шағын жинақты мектептің оқушылары облыстық және халықаралық олимпиадалардағы үздік нәтиже көрсетті. Жобаға қатысқан тірек және магниттік мектептерде білім сапасының өсуі байқалады», дейді Ақтөбе облыстық білім басқармасы басшысының орынбасары Нұргүл Бертілеуова.
Бұдан бөлек, Оқу-ағарту министрлігінің тапсырмасымен Ақтөбе облысында он білім беру округін ашу жоспарланып отыр. 2025 жылдың басында құрылатын бес округтің екеуі облыс орталығында, үшеуі Қандыағаш, Шалқар және Хромтау қалаларындағы мектеп-гимназияларда ашылады. Округтік мектептердегі нәтижелі тәрбие үрдісі және озық оқыту тәсілдері оларға бекітілген мектептерге енгізіледі. Мәселен, Ақтөбедегі Д.Қонаев атындағы мектеп-гимназиясына 15 мектеп, Әл-Фараби атындағы № 21 гимназиясына 24 мектеп бекітілді.
Ақтөбе облысы