Жаңақорған ауданында кәсіпкерлік аясы жыл сайын кеңейіп, өз ісін бастағандар қатары көбейіп келеді. Осы өңірге барған сапарларымызда үйінің алдынан шағын кәсіп ашып, кейін оны үлкен іске айналдырған біраз іскердің жұмысына куә болғанбыз.
Жуырда аудан әкімі Мәжит Сәмитов «Руханият» орталығында жергілікті өнімдер көрмесімен танысып, кәсіпкерлермен кездесті. Кездесуде аудандағы шағын және орта кәсіпті дамыту, жергілікті өнімді көбейту мәселелері талқыланды. Аудан орталығындағы көрмеге өнімін жеткізген кәсіпкердің бірі – Еркінбай Шідербаев. Олардың отбасылық бизнесі 2000 жылдары басталыпты. Бастапқыда дүкен ашып, тауар саудалады. Кейін наубайхананы іске қосып, нан пісіріпті. «Оншақты жылдан кейін бұл салада бәсекелес көбейді. Ұн бағасы да жыл сайын қымбаттап, өнімді азайтуға тура келді», дейді кәсіпкер.
Осыдан кейін ол нарықтағы өтімді тауардың бірі – макарон өнімдерін зерттей бастайды. Базар сөресін толтырып тұрған осы өнімнің неше түрінің өзге елден импортталып келетініне назар аударады. Жоба дайындап, мемлекеттік қолдау нәтижесінде, 19,5 млн теңгеге қол жеткізгенде ең алдымен қондырғы іздеуге кірісті. Тапқан италиялық қондырғы сағатына 160-200 кило өнім шығарады екен.
«Алғашқы өнімді шығарып, сөреге қойғанға дейін біраз қаржы жұмсадық. Осылайша, «Baybol» макароны ақпан айының алғашқы онкүндігінен бастап, аудан нарығына жол тартты. Ай ішінде 2 тоннадан астам өнім шығардық. Макарон сапасы өте жоғары, құрамына ешқандай бояғыш қосылмаған. Әзірге аудандағы сауда үйлері мен дүкендерге өткізіп жатырмыз. Егер сұраныс артып, тапсырыс көбейсе көрші өңірлерге де жеткізуге дайынбыз», дейді кәсіпкер.
Қазір тапсырыс берген қаптаманың келуін күтіп отыр. Жақын күндері сауда нүктелеріне «Baybol» барлық мәліметі жазылған жаңа орамамен түсе бастайды. Кәсіпкер бұрын мұндай өндіріс түрімен айналысып көрмегендіктен өнім кептіргіш жағы аздау болып тұрғанын айтады. Оны көбейткесін цех өз қуатына толық көшеді.
Әзірше цехта 3 адам жұмыс істеп жатыр. Бизнес-жоспарда көрсетілгендей, кептіргіш алған соң жұмысшыларды 6 адамға дейін көбейтеді. Қазір макаронның ракушка, рожки, вермишель секілді түрлері шығарылып жатыр. Бастысы – бағасы сырттан келетін өнімнен арзан. Тапсырыс көлеміне қарай мұнда кеспе, жайма түрлерін де шығаруға болады.
Қызылорда облысы,
Жаңақорған ауданы