Қазақстан Республикасының Қорғаныс министрі Әділбек Жақсыбеков жұмыс сапарымен Корей Республикасында болды.
Онда қорғаныс ведомствосының басшысы осы ел ұлттық Қорғаныс министрі Тэ Енг Киммен кездесті. Нәтижесінде өзара түсіністік пен әскери саладағы ынтымақтастық жөніндегі Меморандумға қол қойылды.
Кешегі күн, яғни 1 қазан – Корей Республикасы Қарулы Күштерінің құрылған күні. Бұл дата 1948 жылдан бері осылай белгіленіп, аталып келеді. Осыған байланысты Қазақстан Республикасы Қорғаныс министрі Әділбек Жақсыбеков Корея қорғаныс ведомствосы басшысы мен жеке құрамын жоғарыдағы атаулы күнмен құттықтап, сапар барысында Қазақстан-Корея арасындағы қорғаныс және қауіпсіздік мәселелері бойынша екі жаққа да пайдалы пікір алмасулар болғанын атап айтты.
Біздің еліміз тәуелсіздік алғалы бері Кореямен жақсы қарым-қатынаста. Соның бірі қос мемлекет қарулы күштері арасындағы өзара байланыс. Оның негізгі бағыттары – Корея жағының Қазақстан әскери-теңіз күштерінің дамуына қосқан үлесі, жоғары деңгейдегі өзара сапарлар мен кездесулер, сонымен бірге қазақстандық әскери қызметшілердің Корея әскери оқу орындарында білім алуы.
Бұл жерден алынған әскери білім cапасы Қазақстан жағын қанағаттандырып отыр. Осыған байланысты Әділбек Жақсыбеков бұл бағытта келешекте ынтымақтастық нығая түсетініне сенім білдірді.
Осы сапарда мемлекет Қорғаныс ведомствосының басшылары арасында Каспий теңізінде әскери және азаматтық кемелерді жөндейтін көп салалы кеме жасау кешенін салу жөнінде де әңгіме қозғалды. Бұл ретте корей жағының технологияны трансферттеу мен қызметкерлерді оқытуды қамтамасыз етуі қарастырылған.
Сапар шеңберінде қазақстандық әскери делегация аталмыш елдің әскери-теңіз училищесінде болды. Мұнда Қазақстан Қорғаныс ведомствосының басшысы аталмыш оқу орнында оқып жатқан еліміз Қарулы Күштерінің әскери қызметшілерімен кездесті.
Бұл түлектеріміз Қорғаныс министрімен бірге жүріп, су ығыстырғышы 450 тонналық корабльді, “STX Co” кеме жасау зауытының цехтарын және радиолакация, байланыс пен бақылау жүйесін түрлі техникалармен жабдықтайтын “Samsung Thales” әскери өндіріс кешенінің кәсіпорнын аралады.
Оксана ПАРПУРА, Қорғаныс министрлігі баспасөз қызметінің өкілі.
Суретті түсірген Ермек САРБАСОВ.