Кеше елордада “Атамекен” одағы” Қазақстанның ұлттық экономикалық палатасының төралқасы мен басқармасының бірлескен отырысы болып өтті. Оған аталған палатаның басшылары Тимур Құлыбаев, Азат Перуашев, сондай-ақ кәсіпкерлік сала мен мемлекеттік органдар өкілдері қатысты.
Бұл басқосуда “Атамекен” одағы” ҚҰЭП-тің сарапшылар тобы әзірлеген экономикалық құқық бұзушылық саласындағы заңдарды ізгілендіру жөніндегі ұсыныстар жобасы мен ұйымдастыру мәселелері қаралды. Жиында баяндама жасаған заң ғылымдарының докторы, профессор И. Борчашвили қаралған мәселеге қатысты “Заң жобасының негізгі идеологиясы басты екі міндетті шешуге бағытталады. Оның алғашқысы кәсіпкерлерді құқық қорғау органдарының негізгі кедергі келтіруінен қорғау болса, екіншісі экономикалық қылмыстардан жәбір көргендерге шығындарын қайтарудың тиімді жолын қамтамасыз ету болып табылады”, – деп атап көрсетті. Сондай-ақ ол заң жобасы құрылымы қылмыстық заңнама мен әкімшілік заңнаманы жетілдіру мәселелері секілді екі басты бағытты қамтитындығын да назардан тыс қалдырмады. Мұнан кейін мінбеге көтерілген бірқатар баяндамашылар да өз ой-пікірлері мен ұсыныстарын ортаға салды.
Әбдірахман ҚЫДЫРБЕК.