Қазақстан Республикасының Президенті Нұрсұлтан Назарбаев Түрік Республикасы Ұлы Ұлттық Жиналысының (Парламенті) Төрағасы Мехмет Али Шахинді қабылдады, деп хабарлады Қазақстан Республикасы Президентінің баспасөз қызметі.
Әңгімелесу барысында экономика, сауда, саяси өзара іс-қимыл, сондай-ақ парламентаралық байланыстарды нығайту салаларындағы екіжақты ынтымақтастықтың кең ауқымды мәселелері талқыланды.
Кездесуден кейін журналистерге арналған брифингте Мехмет Али Шахин Қазақстанның ЕҚЫҰ-ға төрағалығына жоғары баға берді.
– Осы беделді Ұйымға төрағалығы және Астанада ЕҚЫҰ-ның Саммитін өткізу туралы шешімі – Қазақстанның өзінің Тәуелсіздігі жылдарында қандай жоғары табыстарға қол жеткізгенінің жарқын көрінісі, – деп атап өтті Түркия Ұлы Ұлттық Жиналысының Төрағасы.
М.Шахин сондай-ақ 2011 жылы Қазақстан Ислам Конференциясы Ұйымына төраға болатынын, Түркітілдес мемлекеттер Ынтымақтастық кеңесінің бірінші отырысын және Түркітілдес мемлекеттер Ассамблеясының парламентаралық екінші отырысын өткізетінін атап көрсетті. Осылайша, Қазақстан және оның Астанасы 2011 жылы әлемдік маңызы бар оқиғалардың орталығына айналатын болады.
– Әрине, осының барлығына Қазақстан Президент Нұрсұлтан Назарбаевтың басшылығымен қол жеткізді, – деп атап өтті М.Шахин.
----------------------------------
Суреттерді түсіргендер С.БОНДАРЕНКО, Б.ОТАРБАЕВ.