Кеше елордада “Нұр Отан” ХДП Астана қалалық филиалында “Астана қаласының әлеуметтік- экономикалық дамуына Кеден одағы интеграциялық үдерісінің ықпалы” тақырыбында дөңгелек үстел өтті. Басқосуды “Нұр Отан” ХДП Астана қалалық филиалы төрағасының орынбасары Мұхтар Еркетаев жүргізді.
Аталған басқосу “Нұр Отан” ХДП орталық аппаратының Кеден одағының өңірлер үшін артықшылығы туралы іс-шараларды ұйымдастыру, сондай-ақ тұрғындар арасында түсіндірме жұмыстарын жүргізу туралы тапсырмасын орындау мақсатында ұйымдастырылыпты. Қазіргі интеграциялық үдеріс барлық мемлекеттік органдарға, кәсіпкерлерге және өзге де қарапайым тұтынушыларға өз септігін тигізеді. Кеден одағының құрылуы отандық кәсіпкерлер үшін кең жол ашады. Кеден шекарасы болмағандықтан, кеңейтілген рынок көптеген қаржы салушыларды да қызықтырмай қоймайды, дейді дөңгелек үстелге қатысушылар.
Іс-шара барысында Кеден одағының көкейкесті мәселелерін талқылау, бірлескен кедендік аумақ қызметінің бірінші кезеңдегі қорытындысын хабарлау және астаналық өңір үшін жаңа кеден саясатының ықпалды тетіктерін іске асыру жөнінде ұсыныстар қабылдау да назардан тыс қалмаған. Сондай-ақ дөңгелек үстелге арнайы келген сала өкілдерінің ой-пікірлері де ортақ мақсат төңірегінде тоғысты.
Әбдірахман ҚЫДЫРБЕК.